Сугга эштиринге хандыкшылдыг спортчу Сылдыс Сүүр-оолдуң Чагытай хөлдү эштип кешкени бистиң республиканың чурттакчыларынга Тывага болуп көрбээн кайгамчыктыг болуушкун болган.
Сугга камгалал албан черлериниң ажылдакчыларының үделгези-биле Сылдыс Чагытай хөлдү эштип кежип, 7 300 метрни 3 шак 10 минут дургузунда эрткен. Ону кады ажылдап чоруур эштери, Чагытай чоогунда чурттап турар малчыннар, хөлге дыштанып турганнар улуг өөрүшкү болгаш хүндүлел-биле уткуп алганнар.
Чагытайны эштип кежери белен эвес болуру чугаажок. Аңаа Сылдыс 3 чыл дургузунда шыңгыы белеткенген. Узун дистанцияларга эштириниң күш-шыдал болгаш тынарының техниказын шиңгээдип алырынче шыңгыы кичээнгейни салган. Шыырак спортчу эштикчи Сылдыс Сүүр-оолдуң бо үлегер-чижээ Тывага узун дистанцияга эштир спортту сайзырадырынга, Чагытай хөлге маргылдааларны организастап эрттиреринге идиг-даа боор чадавас.
Чагытай хөлдү Сылдыс эштип кешкен дугайында медээ республикага тарай бээрге, бо спортчунуң мурнунда Чагытайны эштип кешкен кижилер бар дугайында бижимелдер социал четкилерге көстүп келгилээн. “Кадай оглу” деп шолалыг Кара-оол деп кижи 60 ажыг харлыында Чагытайны эштип кешкенин Снежана Оюн бижип, ооң дугайында Сосновка, Дүрген суурларның чону билир боор деп демдеглээн.
Ол-ла “Кадай оглу” Оюн Кара-оол хөлдү аай-дедир эштип кежип турганын Азияна Оюн бижип, Сибирьниң эштир спортчуларының командазы Чагытайга 90 чылдарда маргылдааларга белеткенип турда, ол спортчулар-биле мөөрейлешкеш, хөлдү 2 шак 30 минута хире үе дургузунда эштип кешкенин дыңнаткан. “Кадай оглу” Оюн Кара-оолдуң дугайында төрелдери бижий бээр боор деп идегелин Азияна илереткен.
“Кадай оглу” Оюн Кара-оолдуң, Сылдыс Сүүр-оолдуң үлегер-чижээ-биле узун дистанцияларга эштир спортчулар көвүдей бээр чыгыы. Ынчалза-даа спорттуң бо хевири белеткелге хөй чарыгдал болгаш камгалал херек, айыылдыг дээрзин демдеглеп каары артык эвес.
Ш. КҮЖҮГЕТ.
Чуруктарны интернеттен хоолгалаан.
“Шын” №31 2025 чылдың август 14