Чөөн-Хемчикте аянныг номчулга мөөрейи

Чөөн-Хемчик кожууннуң чагыргазының Өөредилге эргелели уруглар чогаалчызы Сергей Михалковтуң 110 харлаанынга тураскааткан аянныг номчулга мөөрейин эрттирген.

Аңаа 5-6 класстың өөреникчилери идепкейлиг киришкен. Чогаалчының “Чугула хүн”, “Номнар чокка канчап чурттап чораан бис”, “Саазынның арыны”, “Үжен алды болгаш беш”, “Фантазёр”, “Шактар”, “Мээң неделям”, “Модада платье” деп шүлүктерин номчаан. Уругларның аянныг номчулгазын дыңнаарга, бир-ле артистер сагындырар.

Шеми, Бажың-Алаак, Чадаананың 4 дугаар школаларының өөреникчилери тиилекчи болганнар. Ол ышкаш шаңналдыг черлерни Чадаананың 1 дугаар, Хөндергейниң, Теве-Хаяның өөреникчилери алганнар.

Уруглар аразында аянныг номчулга мөөрейлери республиканың девискээринде кончуг нептереңгей апарганы өөрүнчүг. Шүлүк чогаалы кандыг-даа кижиниң сагыш-сеткилинге бедик көдүрлүүшкүннү бээри билдингир.

#Чөөн_Хемчик #кожууннар #өөредилге_эргелели #Шеми #Бажың_Алаак #Чадаана #Хөндергей #Теве_Хая #шүлүк_мөөрейи #Сергей_Михалков #Тыва #Тува #Шын_солун #Тывамедиагрупп