Хоойлу-дүрүм
“Тыва Республиканың албан ёзузунуң аттарын ажыглаарының дугайында” ТР-ниң хоойлузунга 2021 чылдың май 19-та өскерилгелерни киирип, Тыва Республиканың адын ажыглаарының чаа дүрүмүн доктааткан. Тываның албан ёзузу-биле доктааткан адын чүгле орус дылда эвес, англи дээш өске-даа дылдарга тускай чөпшээрел чокка ажыглаары хоруглуг. Сайттар, бөлүктер, пабликтер болгаш социал четкилерде ниитилелдер база “Тыва Республиканың албан ёзузунуң аттарын ажыглаарының дугайында” ТР-ниң хоойлузунга киирген өскерилгелерни сагыыр ужурлуг.
Тываның ат-алдарын баксырадыр медээлерни тарадып турар пабликтер Тыва Республиканың албан ёзузунуң адын тускай чөпшээрел чокка ажыглап турганнар. Чижээлээрге, коронавирус хамчыының үезинде бо аарыгдан Тывада хөй кижилер өлүп турарының дугайында шынга дүүшпес медээлерни тарадырга, чамдык кижилер ону эрге-чагырга органнарының медээлери кылдыр билип, чурттакчы чон аразынга улуг дүвүрээзин дойлуп турганын ТР-ниң Юстиция яамызы дыңнаткан.
Латин үжүктер-биле бижээн Тыва деп ат кирген медээлер үндүрген, “Тыва Республиканың албан ёзузунуң аттарын ажыглаарының дугайында” ТР-ниң хоойлузунуң негелделерин сагываан бөлүктерниң болгаш пабликтерниң администраторлары база харыысалгага онаажыр. Хоойлунуң негелделерин үргүлчүлелдиг хажыткан таварылгаларда администраторларны торгаар, а социал четкилерниң удуртулгазы бөлүктерни дуглаарынга чедир хемчеглерни алыр.