Чүрээвистиң кезиин - чаңгыс чер-чурттугларывыска.

Долу эвес мобилизация-биле кыйгырткан чаңгыс чер-чурттугларывыска болдунгу дег деткимче-дузаны чедиреринче Тываның Баштыңы Владислав Ховалыгның кыйгырыынга чүгле яамылар, ведомстволар, тус чер бот-башкарылга органнары эвес, а хөй-хөй эриг баарлыг чонувус база каттыжып, кыйгыртыышкынга келген оолдарга, оларның өг-бүлелеринге боттарының талазында кандыг-бир дуза чедирерин саналдап келгеннер.

Тываның идепкейлиг, бурунгаар көрүштүг аныяктары, волонтерлар шак бо үеде, шакта Кызыл хоорайның Иван Ярыгин аттыг спорткомплекизинде организастаттынган ачы-дуза чыыр пунктуда ажылдап турарлар. Олар шериг албан-хүлээлге күүседири-биле кыйгырткан акыларынга белек кылдыр белек-селек аймаан чыып турар: белен үрелбес аъш-чем аймаа, шериг оолдарга хереглеттине бээр ужурлуг хеп аймаа, эм-таң болгаш чылыг сөстер долган "Солдатка чагаалар".

"Чаңгыс чер-чурттуг акыларывыс бистиң чүректеривис кезиин алгаш чоруптар кылдыр белектерни чыып турарывыс бо - деп, Тываның Аныяктар херектериниң талазы-биле агентилелиниң удуртукчузу Эртине Куулар медеглээн. - Байгы сагыш-сеткиливистен олар дээш сагыш човап, тейлээр бис. Олар бисти, Ада-чуртувусту камгалап турар үеде оларның чоок улузун, ажы-төлүн кагбас, бар шаавыс-биле дузалажырын аазап тур бис".

Ачы-дуза чыыр пунктуже яамылар, ведомстволар, албан-организация төлээлери болгаш чон база белек-селээн эккеп турар. Пункт дүн ортузунга чедир ажылдаар, ынчангаш ырак орукче аъттаныр деп турар оолдарывыска дуза кадыксаар улус дүнекиниң 00.00 шакка чедир И.Ярыгин аттыг спорт комплекизинге чеде берип болур.