Тускай шериг операциязында тайбың ак-көк дээр дээш тулчуп турар дайынчы чаңгыс чер чурттугларывыска ачы-дуза чедирилгезиниң күскү ээлчээ “Шуптузун Тиилелгеже” деп акция-биле уламчылап турар.
Кызыл хоорайда “Строймаркет” садыының коллективи генератор болгаш мотоциклди Улусчу фронтунуң ачы-дуза чыыр баазазынга эккеп берген. Бо бүгү дериг-херексел мурнуку одуругда чоруп турар дайынчыларывыска кончуг херек. Ылаңгыя дизель-биле ажылдаар генераторларның өртээ аар, шынары эки. Садыгның коллективи дайынчы чаңгыс чер чурттуглары дээш сагыш човап, дуза кадып чедип келгенинге улусчу фронтунуң төлээлери өөрүшкүзүн илереткен.
Ол ышкаш Таңды кожууннуң Арыг-Бажы сумузунуң волонтёрлары боттарының холу-биле кылган дооразы 3, узуну 6 метр 6 штук чажыртынар четкилерни болгаш бензин-биле ажылдаар инверторлуг генераторну эккелген. “Бо генератор дааш-шимээн чок, аай-дедир дажыырга чиик болганы-биле мурнуку одуругда чоруп турар дайынчыларга кончуг ажыктыг. Дайынчыларның чагыглары ёзугаар дузаны чедирерин кызыдып турар бис. Октябрь 22-ге чедир гуманитарлыг дуза чедирер үе ам-даа бар. Чаңгыс чер чурттугларывысты акцияга идепкейлиг киржиринче кыйгырып тур бис. Чыылган чүъктү Курск облазынче болгаш Донецкиже чорудар. Дайынчыларның хереглелин 40 тонна чедир чыыр сорулгалыг бис” – деп, Улусчу фронтунуң Тывада координатору Даяна Тажи чугаалаан.
“Чүректиң кыйгызы-биле” мөңгүн волонтёрлар бөлүү 2023 чылда тургустунган. Олар ам 2 дугаар чыл ачы-дуза чедирилгезинде киржип ажылдап турарлар. Эгезинде сумунуң чурттакчы чону дроннар садып бээр сорулгалыг акша-хөреңгини чыып эгелээн. Ооң өртек-үнези хөлүн эрттир аар болганы-биле күш четпезин билгеш, чажыртынар четкилер кылыр деп дугурушкан. Оон бээр четкилерни үргүлчү кылгаш, дайынчыларже чорудуп турарлар. Амгы үеде ооң саны 112 четкен.
“Материал бар-ла болза, болдунары-биле кылып турар бис. Чамдыкта боттарывыс-даа садып ап турар бис. Улусчу фронт база биске дузалажып, четкилер кылыр хендирлерни болгаш пөстерни берип турар. Чылдың үезиниң аайы-биле таарыштыр кылып турарын Жанна Чамбал демдеглээн. Генератор өртээн суурувустуң сагыш човангыр чурттакчы чону чыып берген. Вайлберистен 2 генератор чагыттывыс. Бирээзи келгени бо, ийи дугаары орукта кел чыдар” – деп, волонтёрлар бөлүүнүң төлээзи Жанна Чамбал тайылбырлады.
Арыг-Бажының волонтёрларының аразында янзы-бүрү назы-харның, мергежилдиң кижилери бар. Оларның эң-не улуу 80 хар четкен. Амгы үеде ында эң-не идепкейлиг 10 волонтёр ажылдап турар.
Кызыл хоорайның чурттакчылары Михаил, Алёна Гончаровтарның өг-бүлези ай санында, а харын-даа ийи-даа катап ачы-дуза чыылдазынга киржип келир дээрзин Улусчу фронтунуң төлээлери демдеглээн. Олар бо удаа кургаг душтарны, оңгу лааларын база стразылар-биле чураан камгалакчы бурганның овур-хевирин ыдыктаткаш эккелген.
Чыжыргана СААЯ.
Самба Норбужуктуң тырттырган чуруктары.
«Шын» №39 2025 чылдың октябрь 9