Чуртче арбалеттерни болгаш чаларны эккээр азы үндүр сөөртүр чөпшээрелди алыр дээш, чурттакчылар чаңгыс эвес удаа дилегни кылып турар. Росгвардияның Тывада эргелелиниң дыңнадып турары-биле, ча азы арбалеттиң чепсек кылдыр санаттынып турарындан хамааржыр. “Боо-чепсекке” хамаарышкан Федералдыг хоойлуда арбалеттиң тыртар кезээниң күжү 43 килограммдан, а чаның 27 килограммдан өрү болза, чепсек кылдыр санаттынар. Ынчангаш албан чөпшээрел бижиктиг болур ужурлуг.
Россияның девискээринге арбалеттер болгаш чаларны албан чөпшээрел документилиг ажыглап азы шыгжап болур. Ук сертификатта чепсекке хамаарылгазын албан айтып каан турар.
Бир эвес чаның азы арбалеттиң чепсек эвес деп бадыткап турар херечилели бар болза, Росгвардияның Тывада эргелели Россия Федерациязынче сөөртүрүнге азы чурттан үндүреринге чөпшээрелди бээр.
Чепсектиң шынзылгазын хамааты болгаш албан-дужаал чепсектеринге шынзылга тыпсыр органнар чорудуп турар. Олар үш негелдеге даяныр: “Техниктиг чурум дугайында”, “Национал аккредитация системазында аккредитация дугайында» Федералдыг хоойлуларга болгаш “Рынокта ажыглалының демдээ дугайында” Россия Федерациязының Чазааның доктаалы.
Чепсекти чогуур чөпшээрел чокка боттары кылган болза, шынзылга бербес. Ынчап кээрге Россия Федерациязының девискээринге чалар болгаш арбалеттерниң чепсек азы чепсек эвес дээрзин бадыткап турар херечилелдери бар болза, оларны шыгжап азы ажыглап болур.
Бир эвес хамаатылар, албан-дужаалдыг кижилер чепсекти (ча, арбалет) херечилел чокка сөөртүп, шыгжап, ажыглап турар болза, эрге-хоойлу камгалаар органнарның ажылдакчылары хавыргаш, хыналдаже чорудар эргелиг. Россияның хоойлузу-биле чаның тыртар кезээ үстүнде көрдүнген нормативтерден ашкан болза, хоойлуга удур бүдүргени дээш, кеземче харыысалгазы, оон аңгыда шыгжааны, сөөрткени болгаш ажыглааны дээш, административтиг харыысалга көрдүнген.
Тываның Росгвардиязының парлалга албаны.
“Шын” №27 2025 чылдың июль 17