Чоннуң чаңгыс деминиң хүнүнге тураскааткан байырлыг кежээни Мөрен суурнуң клувунга дыка-ла солун организастаан.
Суурнуң албан черлери аңгы-аңгы националдарның культуразын, уран чүүлүн бараалгаткан. Уруглар садының демниг коллективи якут чоннуң идик-хевин, танцы-самын көргүскеннер. Эмнелгениң коллективи цыган чонну таныштырган. Улуг эмчи Рита Севек, Алдынай Баанай, Оксана Чалзырай «Цыганочканы» дыка-ла чараш самнадылар.
Школаның башкылары болгаш ажылдакчыларының концерти бир онзагай болган. Директору Ольга Михайловна Хомушку, оралакчызы Кызыл-Кат Романовна Ыңаалай баштаан школа коллективи уран талантызын, демин көргүстүлер. Галина Ондар, Галина Хомушку, Чечена Демир-оол, Светлана Арыяевна, Светлана Борагаевна дээш аныяк, хоочун башкылар шупту ында киржип турарлар.
Чараш оюн-тоглааның түңнелинде Мөрен школазының коллективи бирги черге төлептиг болуп, 4 муң рубль-биле шаңнаткан.
Чечекмаа САДИ, ТР-ниң алдарлыг ажылдакчызы.
Эрзин кожуун.
“Шын” №89 2024 чылдың ноябрь 20