Дүүн, январь 16-да, Россияның шупту булуңнарында Владимир Путинни деткип, ат салырының чаңгыс аай хүнүн «Чаңгыс демниг Россия» партиязы чарлаан. Республиканың найысылалында волонтерлары ийи пунктуда ажылдап турар. Тырттырар бөлүк-биле кады үнүүшкүннү кылып, В. Путинни деткиири-биле ат салып келген чон-биле чугаалаштывыс.
Виктор Глухов, ТР-ниң Дээди Хуралының Даргазының оралакчызы, «Чаңгыс демниг Россия» фракциязының удуртукчузу:
– Дээди Хуралдың депутаттары болгаш Хөй-ниити палатазы доозавыс В. Путинни деткиири-биле, ажылдарны чорудуп турар бис. Бөгүн бо залда В.Путинни деткип, ат салыр дээш келген чон хөй-дүр. Владимир Владимирович бо сөөлгү каш чылда Тывага чаңгыс эвес удаа аалдап келген. Ол кезээде-ле манаарывыс аалчывыс-тыр. Сөөлгү каш чылдың дургузунда Президентивис В. Путинниң күжениишкинниг ажыл-ижиниң үре-түңнели болур чүүлдерни амыдыралывыста көрүп тур бис. Россияның чонунуң амыдыралын турумчуй берген деп болур. Оон аңгыда, ооң эгелээни янзы-бүрү федералдыг төлевилелдерниң ачызында келир үеже бүзүрелдиг базымнарны кылып болур апарган бис.
Аюш Нурзут-оол чоокта чаа соңгуур назы чеде берген. Ынчангаш ол бөгүнгү ат салыр хемчегге киржип келген. Владимир Путинниң удуртулгазы-биле Россия ам-даа бурунгаар хөгжүүр дээрзинге Аюш 100 хуу бүзүрелдиг.
«Чуртувустуң Президентизи В. Путин студентилерни бүрүнү-биле деткип турар. Оон ыңай, ол аңгы-аңгы адырларга тергиидээн школачыларны деткип, ниитизи-биле аныяк-өскенниң бурунгаар хөгжүлдезинге бүзүрелди берип турар, күштүг баштыңчы деп санаар мен. Ынчангаш Владимир Путинниң кандидатуразын долузу-биле деткип, ат салыр дээш кел-дим» – деп, Тываның информастыг технологиялар техникумунуң сургуулу Аюш Нурзут-оол чугаалады.
«Бөгүн «Чаңгыс демниг Россия» партиязы чаңгыс дем-биле Владимир Путин дээш ат салыр хүннү чарлаан. Бистиң төөгүвүсте оон шыырак мөзү-шынарлыг, кижизиг чурт баштыңчызы турбаан. Бодумнуң Президентим В. Путинни черле деткип чораан мен, ам-даа деткиир мен. Ынчангаш ат салыр дээш кел- дим» – деп, ТР-ниң депутады Аяна Моңгуш чугаалады.
РФ-тиң Президентизиниң соңгулдалары 2024 чылдың март 15-тен 17 хүннеринде болур. Ынчангаш республиканың дыка хөй чурттакчы чону амдан эгелеп кандидатты деткиири-биле пунктуларда кээп адын салып турар.
Айдың ОНДАР.
Буян ООРЖАКТЫҢ тырттырган чуруктары.
“Шын” №3 2024 чылдың январь 17