Декабрь 1-де «Чаңгыс демниг Россия» партияның регионалдыг салбырының секретары, Тыва Республиканың Баштыңы Владислав Ховалыг «Чаңгыс демниг Россия» партияның даргазы Д.А. Медведевтиң Тыва Республикада чон хүлээп алыр черинге хамаатыларның хүлээп алыышкынын чоруткан.
Кымны-даа мурнай секретарьга назыдап кырааннарның болгаш инвалидтерниң социал ажаалда-тежээлдезин чорудар «Тулас» медицина төвүнүң салбырының удуртукчузу Айдысмаа Ооржак салбырга Кызылдың иштинге аңгы оран-саваны үндүрүп бээриниң база дузаламчы кылдыр эт-сеп, дериг-херекселдер-биле дузалаарының дугайында дилеглиг кирген.
Төптүң удуртукчузунга салбырны Кызыл кожууннуң Черби суурунга ажыдып алырын саналдаан. Бии-Хемни кежилдир көвүрүгнү тудупканының соонда ук чер-биле транспорт аргыжылгазы көзүлдүр-ле экижээн. Ында Төптүң салбырын ажыдарынга таарымчалыг хостуг оран-сава бар, ам артында септеп-селип каан. Черби арыг агаарлыг чурттакчылыг чер болуп турар дээрзинче Владислав Ховалыг кичээнгейни угландырган.
Төпте шимченири хирелиг кижилерни аргыштырарынга удуртукчунуң хууда автотранспортун ажыглап турар дээрзин хүлээп алыышкынның үезинде Владислав Ховалыг билип алгаш, бо айтырыгга дуза кадарын өөренип көөрүн чугаалаан.
Хүлээп алыышкынга олуржуп турган «Чаңгыс демниг Россия» партияның Тыва талазы-биле күүскомунуң удуртукчузу Елена Ховалыг чымчак эт-сеп садып алырынга партияның регионалдыг салбыры дузалаар деп дыңнаткан.
Ооң соонда республиканың Баштыңынга 2022 чылдың июльдан сентябрьга чедир тускай шериг операциязынга киржип турган эки турачы Сылдыс Буян дилеглиг кирген. Дайын-чаа шөлүнден ээп келгениниң соонда, ол орук-транспорт озал-ондаанга таварышкан. Бертиниишкинге база амыдыралдың берге байдалынга таварышканы-биле холбаштыр аңаа материалдыг дузаламчыны көргүзерин дилээн. Ук өг-бүлеге бүгү талалыг дузаны кадарын Владислав Ховалыг дааскан.
Хүлээп алыышкынга олуржуп турган Тываның күш-ажыл болгаш социал хөгжүлде сайыды ук өг-бүлеге өске шериглерниң өг-бүлелеринге дег хөмүр-даш алырынга дузаны катканын чугаалап, оон аңгыда, 30 муң рубль түңнүг акша дузаламчызын алыр деп медеглээн. В. Ховалыг оон аңгыда Сылдыс Буянга дайынчы хөделиишкиннерниң киржикчизиниң шынзылгазын бүгү-ле чиигелделери-биле катай долдурарынга, а ТР-ниң Кадык камгалал яамызынга Сылдыстың өөнүң иштинге инвалид байдалын шынзыткан документ-саавырны долдурарын онза хыналдага алырын дааскан.
Ол хүнгү хүлээп алыышкынның үезинде тускай шериг операциязының база бир киржикчизи Аяс Ооржактың хеймер уруун уруглар садынга тургузарының айтырыы чедиишкинниг шиитпирлеттинген. РФ-тиң Камгалал яамызының госпиталынга эмнээшкин эртип турган болгаш Аяс Андриянович боду хүлээп алыышкынга кээп шыдаваан, ынчангаш регионнуң удуртукчузунга ооң өөнүң ишти Чимис Ооржак кирген. Ол узун шөлээзиниң соонда ажылче үнер деп турар.
Чимис оларның 1,8 харлыг бичии уруунга Кызыл хоорайның 5 дугаар уруглар садындан олутту бээрин республика Баштыңындан дилээн, чүге дизе ооң угбазы база ол садикте чоруп турар. Кызыл хоорайның өөредилге департаментизи ук айтырыгны изии-биле ол-ла дораан шиитпирлээн.
Ажылы чеже-даа чай-хос чок бол, Тываның Баштыңы Владислав Ховалыг ол хүн үш хамаатыны хүлээп алыр аргалыг болган, оларның айтырыгларын шиитпирлээн ийикпе азы шиитпирлээшкинниң чадазында турар.
А. ХЕРТЕК белеткээн.