Кызылдың хоочуннар болгаш инвалидтер дазылга бажыңында 180 ажыг кижи чаңгыс өг-бүлениң ажы-төлү дег эп-найыралдыг чурттап тур бис. Ында кандыг ажылга ажылдавайн чораан улус чок дээр: кадарчылар, саанчылар, эмчилер, башкылар, тудугжулар, бухгалтерлер, даргалар дээш оон-даа өске.
Дазылга чериниң даргазы Херел Игорьевич Күжүгет, оралакчы даргазы Аяс Сергеевич Чимит-оол, улуг эмчизи Оксана Владимировна олар билдилиг удуртуп турарлар.
Ном саңында Людмила Төмүр-ооловна Донгак, күш-ажылче хаара тудар ажылда Наталья Ыймааевна Донгак, сагыш-сеткилди сайзырадыр ажылда Сайлык Сүүр-ооловна Салчак, а кадыының байдалы кызыгаарлыг хоочуннар-биле Алима Александровна Күжүгет ажылдап турар. Артыш Владимирович Сааяның башкарып эрттирип турар культурлуг хемчеглери дыка солун.
5-ки постунуң сестразы Аяна Кызыл-ооловна Монгуш ажылынга кызымак, аарыг улуска эвилең-ээлдек база ол-ла постунуң санитарказы Светлана Монгушевна Дандар ажылынга дыка бердинген, аарыг улустуң идик-хевин, боттарын чуп, постунуң шупту өрээлдерин аштап-арыглап, арыг-силиин тудуп турары эки.
Мында чурттап турар хоочуннарны болгаш инвалидтерни дазылганың удуртулгазы аңгы-аңгы курорттар, аржааннарже дыштандырып чорудуп турары кончуг эки. Бо чылдың июль 12-ден 18-ке чедир 22 кижи Таңды кожуунда Уургайлыг аржаанынга эмненгеш келдивис. Аржаанче бисти удуртуп-башкарып, ажаап-карактап чораан Белек-кыс Дырысовнага база Анай-Хаак Бырдан-ооловнага улуу-биле четтиргенивисти илередир-дир бис.
Бажың-интернатта чурттап турар мынча хөй чонну ашкарып-чемгерип турар повар кыстарывыс Алла Кертик-ооловна Монгуш, Любовь Маадыр-ооловна Дамбыра, Алдынай Анай-ооловна, Марина Кунгааевна оларның эки ажыл-ижин үнелээр бис. Ол ышкаш бисти карактап, хайгаарап турар таңныыл оолдарывыстың ачызында дыка онза дыштыг чурттап тур бис. Бисти аай-дедир аргыштырып турар чолаачыларывыстың кызымаккай ажылын база демдеглээр апаар.
Ынчангаш бажың-интернаттың бүгү-ле ажылдакчыларынга кады чурттап турар эш-өөрүмнүң мурнундан четтиргенивисти илеретпишаан, аас-кежикти, өөрүшкүнү, сүлдези бедик, каң кадык чоруурун күзээр-дир мен.
Светлана СААЯ.
Чуруктарны Кызыл хоорайның хоочуннар болгаш инвалидтерниң бажың-интернадының социал четкиде арнындан алган.
“Шын” № 30 2025 чылдың август 7