2024 чылда Чонну ажылче хаара тудар албанның ажылынга улуг өскерлиишкиннер болган. Ажылче хаара тудар төптерже кээп турар хамаатыларның дүрген ажыл тып алырынче онза кичээнгейни угландырган. Түңнелинде, ажылга тургустунар үе 57 хүнге кызырылган. Ооң мурнунда ортумаа-биле 163 хире хүн турган болза, 106 хүн дургузунда тып алыр апарган.
Сан-чурагай-биле алырга, 8 муң ажыг ажылга тургустунган кижилерниң аразындан 5011 кижи доктаамал ажылды тып алган, а 3588 кижи түр үеде ажылга тургустунган. Оларның 4318-и херээжен, а 4280-и эр кижи. Ажылга тургустунган кижилер колдуунда өөредилге, күрүне эргелели, айыыл чок шериг хандырылгазы, социал хандырылга, кадык камгалалы болгаш саарылга адырларынче кирип турар.
Бо бүгүнү анализтеп көөрге, ажыл дилеп кээп турар күзелдиг кижилер саны эвээжээн. 2023 чылда ажылга хаара тудар албанче 14537 кижи келген болза, 2024 чылда 13516 кижи чедир кызырылган. Ажыл дилеп турар кижилер саны 10 хуу эвээжээн. Ажылче тургустунуп алырының чаа аргалары, “Россияда ажыл” порталын идепкейлиг ажыглап турар апарганы, Россияның Камгалал яамызы-биле керээ чарып турары аңаа салдарлыг болган.
ТР-ниң Чонну ажылга хаара тудар төвүнүң медээзинден белеткээн.
Чурукту интернет четкизинден алган.
“Шын” №2 2025 чылдың январь 23