Чаа аргаларны өөренип алдым

Чыл кандыг эрткенил?
Республиканың онкология диспансериниң хирургия салбырының эргелекчизи Буян Иванович Идам-Сюрюн:

– 2023 чылда ажыл-агыйым талазы-биле шаптараазыннар турза-даа, чедиишкиннер база бар болду. Февраль 4-те Онкологтуг аарыглар-биле демисел хүнүнде Россия чергелиг “Здравствуй” деп онкологиядан аараан улустуң ассоциациязы Тываның болгаш Сибирь федералдыг округтуң мурнундан мени соңгулдаже киирген. Түңнелинде, “Мергежилиниң жемчужиназы” деп номинацияның шаңналын Кремль ордузунга ап, шылгараңгай специалистер аразынче кирдим.

Пациентилеримге мени үнелээни дээш өөрүп четтирдим. Оларның бодалдарын, күзелдерин боттандырып, бүзүрелин оттурупканымның, чедиишкинниг эмнээшкинниң демдээ-дир деп санаар мен.

Ол ышкаш “онкологтуг аарыглар-биле демисел” төп программа-биле бистиң диспансеривиске хөй-ле чаа-чаа дериг-херекселдер кээп турар. Оларның-биле канчаар ажылдаарын, шын ажыглаарын шиңгээдип алыры-биле, 3 дугаар чыл өөренип тур мен. Бо чылын база Россияның Кадык камгалалының Н.Н. Блохин аттыг Национал медицинаның онкология талазы-биле шинчилел төвүнге өөрендим. Чаа аргаларны номдан номчуп, конференциядан дыңнаарынга деңнээрге, делегей чергелиг бедик деңнелдиг эмнелгеде ракты чаа аргалар-биле канчаар эмнеп турарын көөрге, кончуг солун болду. Ол үеде чаа аргаларның авторларының боттарындан канчаар кезип турарын, кандыг айыыл туруп болурун айтырып, сүмележип тургаш, Тывага база ындыг кезиишкинни чорудуп болурун билип алдым. Ук аргаларны ажыглап эгелээрге, кончуг эки болур. Бодумнуң ээлчээмде аныяк эмчилерге база ону өөредири чугула деп санаар мен. Оларга база солун болуру чугаажок.

Чыжыргана СААЯ.

«Шын» №100 2023 чылдың декабрь 30