Январь 25-те республиканың консультация-диагностиктиг төвүнге алды чиик машинаның дүлгүүрүн Өвүр, Тес-Хем, Сүт-Хөл, Бай-Тайга, Таңды болгаш Эрзин кожууннарның төп эмнелгелериниң улуг эмчилеринге ТР-ниң Чазааның Даргазының оралакчызы Орлан Сарыглар болгаш ТР-ниң кадык камгалал сайыды Анатолий Югай тывыскан.
2016 чылдан эгелеп РФ-тиң Президентизи Владимир Путинниң эгелээшкини-биле «Кадык камгалалы» национал төлевилел чурттуң девискээринге боттанып эгелээн. Ук төлевилелдиң ачызында Тыва Республика 127 дүрген дуза чедирер автомобильдерни алгаш, кожууннарга үлээн. Оларның 20-зин 2023 чылда алган.
Ук машиналарны эмнелгеже кээп шыдавас аарыг кижилерниң бажыңнарынче баарда, анализтерни эмнелгеден лабораторияже чедирерде, ырак черде чурттап турар аарыг кижилерге эм-дом чедирерде ажыглаар. 2024 чылда бир дугаар тыпсып турар автомобильдер дээрзин демдеглээри чугула.
Чаа тывыскан алды автомобильдиң аразында хөрек тырттырар аппараттыг көжүп чоруур кабинет-автомобиль база бар. Ону Кызылдың төп эмнелгези алган.
Олча ОНДАР.
Буян ООРЖАКТЫҢ тырттырган чуруктары
«Шын» №6 2024 чылдың январь 27