Бүдүн чылды чурттап эрткеш, Чаа чылды уткууру ышкаш үнелиг байырлал чок. Ону бүгү өртемчейде кижи бүрүзү байырлап турар. Мен бодум үшкү назынче шилчип, улуг назылыг өгбе болдум.
Чаңгыс оглумнуң 4 ажы-төлүнүң ажы-төлү — уйнуктарымның чаш салгалдары немежип турарынга дыка өөрүп турар мен. Оларны карактажып, сонуургап, кады ойнап, чаптап мага ханмас-тыр мен. Уйнуктарым кандыг айтырыглар салбас дээрил, билбес чүвези чок, сагынгыр-тывынгыры-биле мени кайгадыр-дыр.
Чаа чыл бүдүүзүнде салгалдарымга аяс хүн, тайбың дээр адаанга аас-кежиктиг чурттап, бурунгаар көрүштүг, соруктуг-ла болуңар деп йөрээр-дир мен!
Чечекмаа ОНДАР-ООЛ, 80 харлыг өгбе, күш-ажылдың хоочуну.
Кызыл хоорай.
“Шын” №50 2025 чылдың декабрь 25