Тываның Баштыңы Владислав Ховалыг бүгү тыва чонну Чаа чылды өг-бүлези-биле оожум уткуурунче кыйгырган.
«Бистиң оолдарывыс, акы-дуңмавыс, дыка хөй чаштарның ачалары мурнуку шугумда изиг тулчуушкуннарда турда, бис сагыш-сеткиливис-биле оларның чанынга болуп, ажыл-херектеривис-биле оларны деткиир ужурлуг бис. Кандыг-даа хөглээшкин, байыр-найыр, ылаңгыя коллективтии-биле корпоративтер эрттирип, салют, фейерверктер чазылдырары таарымча чок. Ындыг чорук тускай шериг операциязында дайынчыларывысты үнелеп көрбейн, тоовайн турарывыс ол болур» — деп, бодунуң блогунга ол бижээн.
Ынчалза-даа уруг-дарыгга, чаш ажы-төлге тоолзуг чараш Чаа чыл байырлалы школаларга, уруглар садтарынга албан болур. Оларга янзы-бүрү хемчеглерни чер-черлерге эрттирер, дош хоорайжыгаштар, чуңгулаар чараш черлер ажыттынар. Ажы-төлге, ылаңгыя тускай шериг операциязында киржип турар дайынчыларның уруг-дарыынга, кичээнгей улуг болур. Оларга Чаа чыл ёзулуг хуулгаазын, чылыг, чигирзиг байырлал болуру чугаажок.
«Чурттакчы чонувусту байырлалды чоок кижилери-биле демдеглеп, камнап алган акша-хөреңгизин шериг албанныгларывыска гуманитарлыг дуза чедиреринге ажыглаарын кыйгырып тур мен. Шак мындыг кызыгаарлаашкыннарны чүгле бистиң регионда эвес, а өске-даа регионнарда: Ставропольда, Башкортостанда, Крымда, Ленинград облазында, Краснодар крайда, Чувашияда киирип турар. Ал-бодувусту туттунуп, хүндүткелди, ёзулуг быжыг тура-сорукту көргүзүп көрээлиңер!» — деп, Владислав Ховалыг Тываның чонун кыйгырган.
Медээни Чазак Даргазының албан ёзузунуң арнындан алган.
Чурукту интернеттен хоолгалаан.
“Шын” №48 2025 чылдың декабрь 11