Чаа чылдың бүдүүзүнде база январьның эгезинде кожуун, республика, Россия, делегей чергелиг янзы-бүрү маргылдаалар байырлыг байдалга болуп эрткен. Оларның кол сорулгазы чоннуң спортка сонуургалын, кадык амыдыралче чүткүлүн оттурары болгаш “Чаштар спорту”, “Спорт школаже” деп төлевилелдерни боттандырары база Олимпиада оюннарының тиилекчилерин белеткээри болур.
Декабрь 27–29 хүннеринде Красноярскыга 4 дугаар Д.Г. Миндиашвили аттыг Бүгү-россия чергелиг хостуг хүреш маргылдаазының соонда бистиң 15 мөгевис январь 25–29 хүннеринде XXXV И.С. Ярыгин аттыг делегей чергелиг маргылдаага киржир эргени алганнар.
Улуг тренер Меңги Мортуй-оол маргылдааның түңнелдерин дыңнаткан: 57 килге Начын Монгуш (тренери А.Хомушку), Кежик Седен (тренерлери Э.-М. Донгак, М.Мортуй-оол), Аяндай Ондар (тренери Отук Сат); 61 килге Амир Чамзын (тренери Д.-С.Ондар), Альберт Тумат (тренери М.Ооржак), Ачыты Ондар (тренери Отук Сат), Кежик Монгуш (тренерлери А.Самдан, Р.Борукшонов); 65 килге Эзир Түлүш (тренерлери С.Кенден, М.Мортуй-оол), Кежик Ооржак (тренери Т.Ооржак), Чаян Монгуш (тренерлери А.Самдан, Р.Борукшонов); 70 килге Сайын Казырык (тренери Б.Бурбучук); 86 килге Баяр-Сайхан Бады (тренери Д.-С. Ондар); 97 килге Бады-Маадыр Самдан (тренери А.Чадамба); 125 килге Лопсан Самбуу (тренерлери А.Родохин, К.-Х.Бадан); кыс уруглар аразынга 50 килге Алдынай Даржаа (тренерлери А.Достай, Л.Ооржак). Бо мөгелер "Херел" спорт залында дуржулгалыг тренерлерниң удуртулгазы-биле белеткелин эгелей бергеннер.
Кадык болуңар, бистиң-биле танцылаңар
Декабрь айның төнчүзүнде Москвага Россияның күш-культура, спорт болгаш кадык амыдырал талазы-биле хөй-ниити палатазы “Кадык амыдыралче чүткүлдү алдаржыдар 100 тергииннер” деп мөөрейниң тиилекчилерин шаңнаан. Оларның аразынче Тываның Танцы спортунуң чөвүлели “Кадык болуңар, бистиң-биле танцылаңар” деп төлевилели-биле кирген. Шаңналды Россияның уран гимнастиказының алдарлыг тренери, Россияның күш-ажыл маадыры Ирина Виннерниң холундан танцы спортунуң чөвүлелиниң удуртукчузу Кызыл Калдарович Куулар алган. Бо 2025 чылда Танцы спортунуң чөвүлели 15 чылдаан байырлалын демдеглеп эрттирер.
Анастасияның чедиишкини
Тыва спортчулардан 2025 чылда бир дугаар улуг тиилелгени шыдыраачы кыс Анастасия Ооржак (тренери С.Ы. Ооржак) алган. Январь 3–8 хүннеринде Новороссийск хоорайга болган Бүгү-россия чергелиг шыдыраа маргылдаазынга 13 харлыг уруглар аразынга Анастасия бирги черни алганы чаңгыс чер чурттугларынга улуг чоргаарал.
Рождество Кубогу
Абаканга январь 3–7 хүннеринде “Рождество Кубогу” деп мини-футбол маргылдаазы 2 бөлүкке байырлыг, көдүрлүүшкүннүг болуп эрткен. Чидиг оюннарның түңнелинде бирги бөлүкке 1 дугаар черни “Абакан”, 2-ги черни “Катаново”, үшкүзүнге “Азия Төвү” (Кызыл) командалары төлептиг болган. “Тергиин вратарь” деп тускай шаңналга Буян Болат-оол, “Тергиин халдакчы” Мирослав Монгуш олар төлептиг болганнар. Ийиги бөлүкке 1 дугаар черни “Абакан–1”, 2-гизин “МЧС” (Кызыл), 3 дугаарын “Абакан-2” командалары алган.
Январь 4–8 хүннеринде Улан-Удэ хоорайга XIX дугаар делегей чергелиг 1 сая акша шаңналдыг мини-футбол маргылдаазының дугайында “Сүбедей” спорт школазының хоочун методизи Алексей Ахмедович Аракчаа тайылбырлаан. Аңаа Кыдат, Моол, Узбекистан, Казахстан, Россиядан 24 команда киришкен. Түңнелинде, маргылдааның Кубогун Улан-Удэниң “БайкалАвтоТрак” командазы алган. 2-ги черде делегей маргылдаазының киржикчизи Узбекистандан “Навбахор” командазы болган, үшкүзүнче Новый Уренгойдан “Факел-Ямал” командазы кирген. Аңаа бистиң республикадан “Мажалык” командазы 11–12 дугаар чер дээш Кыдаттың чемпиону “Ханчжоу” командазы-биле чараш оюнну көргүскеш, судьяларның бедик үнелелин алган.
Бут бөмбүү школаже
"Сүбедей" спорт ордузунга январь 4-тен 9-ка чедир Бүгү-россия чергелиг “Футбол школаже” деп төлевилелдиң боттанылгазы-биле бут бөмбүүнүң маргылдаазы болган. Маргылдааның республика чергелиг чадазынга 4 бөлүкке 500 хире ойнакчылыг 40 команда чараш, шынарлыг оюнну көргүскен. Маргылдааны республиканың Спорт база Өөредилге яамылары организастап эрттирген.
Бөлүктерге назы-хар аайы-биле дараазында командалар шылгараан:
Бичии кыс уруглар аразынга бирги черни Бажың-Алаак школазы, 2–3-кү черлерни Шагаан-Арыгның 1 дугаар база Ак-Довурактың 3 дугаар школалары алган. Улуг уруглар аразынга 1-ги черни Аксы-Барлык школазы, 2–3-кү черлерни Кызылдың 9 дугаар гимназиязы база Чааты школазы алган.
Бичии оолдар аразынга 1-ги черни Кызылдың 15 дугаар лицейи, 2–3 дугаар черлерни Хандагайты база Кызыл-Даг школазы алганнар. Улуг оолдар аразынга 1-ги черни Шагаан-Арыг школазы, 2–3 дугаар черлерни «Өлчей» лицейи база Кызылдың 3 дугаар школазы алган.
Ортумак назы-харлыг уруглар, оолдар аразынга: кыс уруглар аразынга бирги черни Элегес-Аксы школазы, 2–3-кү черлерни Бай-Хаак школазы база Мугур-Аксының 1 дугаар школазы алган. Оолдар аразынга бирги черни Шагаан-Арыгның 2 дугаар школазы, 2–3-кү черлерни Кызыл-Мажалыктың 1 дугаар база Чадаананың 1 дугаар школалары алган.
2007–2008 чылдарда төрүттүнген уруглар, оолдар аразынга: кыс уруглар аразынга Эйлиг-Хем школазы, 2–3-кү черлерни Кызыл-Даг база Балгазын школалары алган; оолдар аразынга 1-ги черни Кызылдың 5 дугаар гимназиязы, 2–3-кү черлерни Хову-Аксы база Каа-Хемниң 1 дугаар школалары алган. Тиилекчи командалар февраль айда Томск хоорайга Сибирь девискээриниң бирги чери дээш ойнаарлар.
Кадыы кызыгаарлыг спортчулар маргылдаалары
Январь 3–7 хүннеринде кадыы кызыгаарлыг спортчулар аразынга “Спортчу үе база кадыкшыл” деп төлевилел-биле хүреш, шыдыраа, пауэрлифтинг, ча адарынга маргылдаалар байырлыг байдалга болуп эрткен. Маргылдааларны Тускайлаттынган хевирниң спорт школазы көрдүнген чурум езугаар эрттирген.
Январь 3-те "Херел" спорт залынга дыңнаары кошкак спортчулар аразынга тыва хүреш маргылдаазын тренер башкылар Артыш Доржу биле Евгений Дүвендей олар удуртуп эрттирген. Түңнелинде, дараазында 4 мөге шылгарап үнген. Бирги черни спорт мастери Экер Сат, үжүүрүнде спорт мастеринге кандидат Аюш Лопсан-Комбу, 3–4-кү черлерни спорт мастеринге кандидат Айыс Ондар биле разряд чок Шолбан Ховалыг үлешкеннер.
Январь 5-те "Сүбедей" спорт ордузунга коляскада олурар спортчулар аразынга пауэрлифтинг маргылдаазын кол шииткекчи Сылдыс Тюлюш биле секретары Чечен Саржат-оол эрттиргеннер.
Херээжен спортчулар аразынга 65 кил чедир бирги черни Шеңне Долгай-оол, 2–3-кү черлерни Чечекмаа Ондар база Урана Күжүгет алганнар. 65 килден өрү спортчулар аразынга 1-ги черни Кармела Монгуш, 2–3-кү черлерни Айдасай Монгуш база Валентина Минчит-оол алганнар.
Эр улус аразынга 70 кг спортчулар аразынга 1-ги черни Руслан Очур, 2–3-кү черлерни Владислав Тюлюш база Чингиз Хууракпан алганнар. 70 кг өрү килдиг спортчулар аразынга 1-ги черни Бай-Белек Донгак, 2–3-кү черлерни Херел-оол Ооржак база Владислав Сат алганнар.
Январь 5-те Школа интернатка дыңнаары кошкак спортчулар аразынга шыдыраа маргылдаазын кол шииткекчи Алдар Ооржак удурттуп эрттирген. Түңнелинде, эр улус аразынга 1-ги черни Сылдыс Балчий, 2–3-кү черлерни Чечек-оол Дүвендей база Санчы Сенги-Доржу алганнар. Херээжен улус аразынга 1-ги черни Айлак Бойгал, 2–3-кү черлерни Онзагай Доржукай база Лаура Иргит алганнар.
"Алдын согун" спорт залынга январь 7–8 хүннеринде коляскада олурар спортчулар аразынга “Чаа чылдың согуннары” деп ча адарының маргылдаазы 2 хевирге болуп эрткен. Баштай 18 метр ырактан адарынга дараазында спортчулар шылгараан: эр улус аразынга 1-ги черни 2 разрядчы Владислав Сат, 2–3-кү черлерни делегей чергелиг спорт мастери Руслан Очур база спорт мастеринге кандидат Сайын Кашпык-оол алганнар; херээжен улус аразынга 1-ги черни спорт мастеринге кандидат Айдасай Монгуш, 2–3-кү черлерни 1-ги разрядчы Чечекмаа Ондар база 3-кү разрядчы Долгар Ондар алганнар.
Алексей ЧАМБАЛ-ООЛ, хоочун спортчу.
«Шын» №1 2025 чылдың январь 16