Казначейство чериниң үделгези-биле болгаш республика бюджединиң акша-хөреңгизиниң күсели-биле акшаландырып турар күрүне чагыгларының күүседикчилериниң аванс акшазын 50 хуу чедир улгаттырган, ынчалза-даа ол бюджет хүлээлгелериниң үлүүнден ашкан туруп болбас. Эрткен хүннерде республиканың Чазаа ындыг доктаалды хүлээп алган. Ооң кол ужур-утказы – 2023 чылда керээлиг организацияларны болгаш күүседикчилерни деткиири болур.
Ведомстволар аразында штабтың хуралынга республикада федералдыг казначейство чериниң удуртукчузу Солаңгы Сааяның тайылбырлааны-биле алырга, казначейство чериниң үделгези-биле болгаш республика бюджединиң акша-хөреңгизиниң күсели-биле акшаландырып турар күрүне чагыгларының талазы-биле авансылаашкынны 50 хуу чедир, а казначействонуң үделгези чок күрүне керээлерин 30 хуу чедир акшаландырары көрдүнүп турар. Саналдап киирип турар дүрүмнүң эгелекчилери ындыг чүүлдүң ачызында немелде курлавырларже орук ажыттынар, организациялар салдынган сорулгаларны улам үре-түңнелдиг болгаш дүргени-биле шиитпирлээр дээрзинге бүзүрелдиг.
Бистиң чуртка хамаарыштыр санкцияларның ыйыдыышкыны күштелген үеде экономиканың быжыг чоруун хандырары-биле Тываның Чазаа федералдыг төптүң сүмелээни езугаар 2022 чылда мындыг арганы ажыглап турганын сагындырып каалы. Ындыг чүүл бизнеске чаа байдалдарга ижигер арганы берген.
/ А. ХЕРТЕК белеткээн.
"Шын" 2023 чылдың март 29 №22
#Шын #Чаадүрүм #Чазак #Казначейство #Бюджет #Медээлер
Чаа дүрүм езугаар
29 марта 2023
43