Каа-Хем кожууннуң Бояровка суурда “Кадык камгалалы” национал төлевилелдиң “Кадык камгалалының бирги звенозун чаартыры” программаның боттанылгазы-биле чаа фельдшер-акушер пунктузунуң тудуун дооскан. Ол Каа-Хем кожуунда чаа чылдың баштайгы хүннеринде чонга эжиктерин ажыдып турар үш ФАП-тың бирээзи болур.
ФАП амгы үениң одалга системазы-биле, изиг, соок суг хандырылгазы-биле дериттинген. Ол ооң мурнундагы оран-савага деңнээрге, чырык, делгем, пациентилер хүлээр, тарылга салыр, эмнээшкин чорудар кабинеттерлиг.
ФАП-тың байырлыг ажыдыышкынынга кадык камгалал сайыдының бирги оралакчызы Марианна Куулар Чаа чыл таварыштыр суурнуң чурттакчыларынга болгаш эмнелге ажылдакчыларынга бодунуң өмүнээзинден болгаш Тываның Кадык камгалал яамызының мурнундан байырын чедирген. Кожуун чагыргазының мурнундан Индира Ооржакка өөрүп четтириишкин бижиин база тывыскан. Ол фельдшер-акушер пунктузунга хөй чылдарда эргелекчилеп, чаңгыс чер чурттугларының хүндүткелин, бүзүрелин чаалап ап чоруур.
Баштайгы медицина пунктузу 1936 чылда суурнуң чагыргазының оран-савазынга туттунган. Бирги фельдшер Анфиса Петровна Окунева, акушер Александра Петровна Власова, санитарка Мария Петровна Фролова олар ажылдап турганнар.
Бояровка суурнуң фельдшер-акушер пунктузу 608 чурттакчыны, оларның иштинде 199 чаштарны хүлээп ап турар. Чурттакчылар аразында 40 кижи инвалид, оларның 3-ү бичии уруглар.
Чойгана Казол чаа ФАП-ка эргелекчилеп, а Алимаа Монгуш акушерлеп ажылдаар аас-кежиктиг болганнар. “Биске бо дээрге, үрде манаан болуушкун-дур. Чаа ФАП-тың ажыттынарын четтикпейн манап турган бис. Чаа ФАП-тың оран-савазы эрги ФАП-биле чаңгыс кудумчуда турар. Эрги оран-савага ажылдап тургаш, чаштар дээш сагыжывыс аарып турган. Чүге дээрге, ында печка одаар, соок үеде оран-сава эргижирээнинден орта чылытпас апарган турган. Соок боорга чаштарны чогуур байдалга шинчиири берген турган” – деп, Алимаа Монгуш сагыш-сеткили-биле үлешти.
ФАП ажыттынган хүнден тура-ла чурттакчы чон хан базыышкынын хынадып, чаш төлүн көргүстүрүп, дуза дилеп кээп эгелей берген.