Тывага «Ада-чурт камгалакчылары» деп чаа фондунуӊ регионалдыг салбырын ажыдар.
2023 чылдыӊ апрель 3-те Россияныӊ Президентизи Владимир Путин «Ада-чурт камгалакчызы» деп күрүне фондузун тургузарыныӊ дугайында Чарлыкка атты салган.
Президентиниӊ даалгазы-биле тургускан чаа Фондунуӊ регионалдыг салбырыныӊ ажыдыышкыны май 31-де болур. Байырлыг ажыдыышкын ёзулалынче тускай шериг операциязыныӊ киржикчилерин, өг-бүлезиниӊ кежигүннерин, дайынчы хөделиишкиннерниӊ хоочуннарын, 55-ки даг-адыгжы бригаданыӊ командылалын болгаш регионнуӊ удуртукчу даргаларын чалаан.
Тускай шериг операциязыныӊ киржикчилеринге, Ада-чурт камгалаар хүлээлгезин күүседип тургаш, амы-тынындан чарылган дайынчыларныӊ өг-бүлезинге дузалаар чаа фондунуӊ кол сорулгаларын, ажылдаар уг-шиин аӊаа таныштырар.
Кадыкшылыныӊ байдалын экижидип, амыр-тайбыӊ амыдыралга база катап ижигип чаӊчыгарынга ажык-дузалыг реабилитацияларны эрттирери, психологтуӊ арга-сүмелиг дузазын чедирери, эмнер-биле хандырары, санитар-курорт эмнээшкинин организастаары, фондунуӊ кылыр ажылы болур. Оон аӊгыда, хоочуннарныӊ чаа эртем-мергежил чедип алырынга, ажылга кирип алырынга болгаш амыдыралчы айтырыгларны чогумчалыг шиитпирлээринге дузалажыр. Бир эвес кемдеп-келдерээн хоочуннарны үр үе иштинде азырап карактаар, ажаап-тежээр ужурлуг апаар болза, аӊгы чурттаар оран-саваны белеткээрин организастаар.
Тывада ук Фондунуӊ салбырынга ажылдаар улусту социал ажылдыӊ уг-шиин эки билир кылдыр тускай өөредип, белеткеп турган. Олар хоочуннарныӊ болгаш мөчээн маадырларныӊ өг-бүлелериниӊ амыдырал-чуртталгазынга дорт хамаарылгалыг социал хандырылга айтырыгларын шиитпирлээр сорулга-биле ажылдаар.
«Ада-чурт камгалакчылары» фондунуӊ регионалдыг салбырыныӊ адрези: Кызыл хоорай, Кызыл партизаннар кудумчузу, бажыӊ 30.
/ Р. ДЕМЧИК белеткээн.
"Шын" №39 2023 чылдың май 31