Бичии оолдар, уругларны спортка хаара тударынга байдал Чаа-Хөл кожуунда улам таарымчалыг апарган. Дүүн, август 9-та, Чаа-Хөл суурга “Эзирлерниң уязы” биче спорт залдың эжиктери байырлыы-биле ажыттынып, спортка хандыкшылдыг оолдар, уругларны хүлээп алган. Чаа-Хөлдүң бичии мөгелери «Эзирлер уязынга» баштайгы девиг езулалын эрттирип, девээннер.
Чаа-Хөлдүң “Эзирлер уязын” 2021 чылдың сентябрь айда тус черниң чурттакчы чону боттарының деми, улусчу арга-биле тудуп кирипкен. Эгезинден тура-ла чаа-хөлчүлерниң “Эзирлер уязының” тудуунга киржилгези кончуг идепкейлиг болган. Чүгле кыштың соок хүннеринде түр када соксаш кынган. 2022 чылдың чазы дүжери билек-ле, спорт залының тудуун улаштыр тудуп кирипкен. Эң ылаңгыя күш-культура башкылары, спорттуң аңгы-аңгы хевирлеринге тренерлер дыка кызымак ажылдааннар. “Эзирлер уязының” тудуунга ажылдаан кижилер шупту боттарының күш-ажылы дээш согур көпеек-даа ажыл төлевиринге албааннар. А Чаа-Хөл суурнуң чурттакчыларының өг-бүлелери тудугга ажылдааннарны ээлчежип чемгерип турганнар. Малчыннар тудугжуларны тыва улустуң ынак чеми “изиг хан”-биле хүндүлеп, эът-биле хандырып, деткимчени көргүскеннер.
Тываларның “Демниг сааскан теве тудуп чиир” деп үлегер домаанда ышкаш, Чаа-Хөл суурнуң чурттакчылары демниг ажылдааш, 2022 – 2023 өөредилге чылынга уткуштур “Эзирлер уязын” тудуп доозупкан.
Спортчу биче ордунуң байырлыг ажыдыышкынынга чүгле Чаа-Хөл суурнуң чону эвес, Ак-Туруг, Булуң-Терек, Шаңчы суурларның спортка хандыкшылдыг чурттакчылары болгаш чалаткан аалчылар база келгеннер. “Эзирлер уязын” ажыглалга кииргениниң байырлалын Чаа-Хөл кожууннуң Төлээлекчилер хуралының даргазы Арина Чамбал ажыткаш, тус черге улуг ужур-дузалыг онзагай болуушкун-биле холбаштыр бичии спортчуларга, оларның күш-культура башкыларынга, спортчу тренерлерге, ада- иелерге байырны чедирген.
“Эзирлер уязының” байырлалынга чалаттырган аалчыларның аразындан Тыва Республиканың Дээди Хуралының Даргазы Каң- оол Даваа, Тываның күрүне университединиң башкызы, биология эртемнериниң кандидады, республиканың хоочун спортчуларының бирээзи Сергей Ондар олар “Эзирлер уязының” ажыттынганы-биле чаа-хөлчүлерге, эң ылаңгыя, спортчу оолдар, уругларга байырны чедирип, “Эзирлер уязынга” спортчу маргылдааларга ыяк кылдыр белеткенип алгаш, спортчу тиилелгелерниң бедиинче ужуп үнерин күзээннер.
“Эзирлер уязын” тударынга эң идепкейлиг киришкен Чаа-Хөлдүң чурттакчыларын шаңнап-мактаан. Оларның аразында тренер башкылар Ачыты Сарым-оол, Радомир Данзын, Анжела Моңгуш дээш өскелерге-даа Мактал бижиктерни, үнелиг белектерни тывыскан.
Чаа-Хөл кожуунда спорттуң материал-техниктиг баазазы сөөлгү ийи чылдарда элээн быжыккан деп болур. Эрткен 2021 чылдың күзүн Ак-Туруг суурга ангар хевирниң спорт залын ажыглалга киирген. Булуң-Терек суурга “Эзирлерниң уязы” хүреш залын туткан. Чаа-Хөлдүң “Эзирлер уязы”-биле кады 3 чаа спорт залы ажыглалга киргени ол.
“Эзирлер уязын” хүреш залы деп санап турза-даа, аңаа чүгле мөгелерни эвес, спорттуң өске-даа хевирлеринге аныяк-өскенни хаара тудуп, өөредип, шыырак спортчуларны белеткеп үндүрүп болурун арга-дуржулга көргүскен.
Чаа-Хөлдүң спортчу ат-алдарын Аян Сараа, Айдың Отчуржап, Саян Сат дээш өске-даа мөгелер республика чергелиг болгаш оон дашкаар маргылдааларга ылаптыы-биле камгалап, тиилелгелерниң бедик чадаларынче үнүп чорааннар. Чаа-Хөлге “Эзирлер уязы” туттунган соонда ындыг спотчуларның саны улам көвүдээр, Чаа-Хөл кожууннуң спортчу сүлдези дыка бедик киискиири чугаажок.
“Шынның” корр.