Чаа-Хөлдүң малчыннарында кыштаглаашкын хүр-менди.

Чаа-Хөл кожуун чагыргазы малчыннарның кандыг байдалдыг кыштаглап, байырлал хүннерин эрттирип турарын хынап хайгаараар ажылдары уламчылавышаан.

Январь 6-да Шаңчы сумузунче көдээ ажыл-агый килдизиниң, мал эмнелгезиниң специалистери кожууннуң төп ном саңының ажылдакчызы-биле кады Чаа чыл таварыштыр чигирзиг белектерни малчыннарга үлевишаан, 15 кыштагны кезээн.

Корум-чурум аалдарда эки. Кыштагларже аргыжар оруктар ажык. Кожуунда ажык одар белчиирлер 70 хуу. Мал чеми кыштагларда бар. Малдың ниити деңгели чүгээр байдалда. Үнүүшкүннер январь-8-ке чедир уламчылаар.