Июнь 16-да Чаа-Хөлге тыва чаңчыл ёзугаар Санкт-Петербургтан Анатолий Владимирович Семёнов биле Новосибирскиден Валерия Леонтьевна Денисенко деп аныяк археолог эртемденнер өг-бүле туткан байырлалын эрттирген.
Чылдың-на Санкт-Петербургтан экспедиция Чаа-Хөлде Саян-Шушенскиниң суг шыгжамырының девискээринге археологтуг казыышкыннар чорудары-биле кээп турар. Оларның удуртукчулары хөйге билдингир эртемденнер Марина Килуновская биле Владимир Семенов Тывага ынакшаан археологтар дээрзин ылаңгыя чаа-хөлчүлер эки билир. Бо удаада оглунуң кудазын база тыва ёзу-чаңчыл сагып Чаа-Хөлге эрттирген.
Чаа өгленген аныяктарга Чаа-Хөл кожууннуң мурнундан ооң чагырыкчызы Радж Баз-оол чылыг-чымчак күзээшкиннерлиг байыр чедиргеш, аас-кежикти, олча-омактыг, эп-найыралдыг болурун күзээн.
Өгленишкен аныяктарның байырлалы орус-тыва чоннарның найыралын улам быжыктырып, “Найыр-самы” деп танцы-биле доозулган.
Чаа-Хөлдүң Культура бажыңының медээзи.