Тывада «Өг-бүлениң үнелиг чүүлдерин кадагалап арттырганы дээш» медальды тургузар дугайында айтырыгны шиитпирлеп турар. Тыва Республиканың Баштыңы Владислав Ховалыг парламентиге чылдың-на бээр Айыткалында чаа күрүне шаңналын киирерин саналдаан. Тываның Чазаа саналды хоойлу төлевилели кылдыр кылыр, ону май 28-те болган хуралга көрген. Амгы үеде хоойлу төлевилелин Дээди Хуралдың депутаттарының сайгарылгазынче чоруткан.
ТР-ниң Күш-ажыл яамызының специалистериниң белеткээн документизинде медальды бадыланчып, өг-бүле туткандан бээр – 50, 55, 60, 65, 70 база 75 чылдаан юбилейин демдеглеп турар өг-бүлелерге тыпсырын айыткан. Ол дээрге өг-бүлениң чаңчылчаан үнелиг чүүлдерин кадагалап сайзырадырынга, өг-бүле институдун болгаш бадылажылганы быжыглаарынга, ниитилелге өг-бүлениң ролюн бедидеринге оларның ачы-дузазын деткиириниң болгаш хөй-ниитиге үнелээриниң бир хевири-дир.
«Өг-бүлениң үнелиг чүүлдерин кадагалап арттырганы дээш» деп медальга чылдың-на 19 өг-бүлени киирер. Өг-бүлелерни шаңнап тура, 50 муң рубль акша шаңналын тыпсыр. Республика бюджединде ол сорулгага чыл санында 950 муң рубльди тускайлаары көрдүнген.
«Өг-бүлениң үнелиг чүүлдерин кадагалап арттырганы дээш» медаль Тываның үлегерлиг өг-бүлелеринге тыпсып турары чаңгыс шаңналы эвес-тир. 25 чыл ажыг өг-бүле болуп кады чурттаан, төлептиг ажы-төлдү өстүрген хөй ажы-төлдүг өг-бүлелерни «Ынакшыл болгаш шынчы чорук дээш» хөй-ниити медалынга немей акша шаңналы-биле база деткиир. Республика «Чылдың өг-бүлези» деп Бүгү-российжи мөөрейге тиилээн өг-бүлелерге деткимче кылдыр 100 муң рубльди база маадыр иелерге 500 муң рубльди төлеп турар.
А. МОНГУШ.
Буян ООРЖАКТЫҢ тырттырган чуруу.
«Шын» №21 2025 чылдың июнь 5