Таңды кожууннуң Успенка суур совет үеде элээн сайзыраңгай суурларның бирээзи турган. Каас-чараш агаар-бойдустуг Таңды сынның эдээнде улуг эвес суурга ажыл-агыйжы кижилер чурттап, тараа болгаш ногаа аймаан хөйнү тарып өстүрүп, мал-маганны эңдере азырап чорааннар. ССРЭ-ни Никита Хрущев баштап турган үеде “суурларны улгаттырар, бичии суурларны чаңгыс суур кылдыр бөле көжүрер, ооң-биле кады чоннуң культура-массалыг болгаш социал чаагай чоруун көдүрер” политиканы чоруткан түңнелинде Таңдыда Успенка, Бии-Хемде Ленинка ышкаш бичии суурлардан чурттакчы чонну көжүрген. Ооң түңнелинде ол суурларның турган черлери ээнзирээн.
Амгы Россия үезинде база суурлар кагдынып, ээнзиреп турда, Тывада бичии суурларже ажыл-агыйжы кижилер көжүп кээп, оларны чоорту сайзырадып, боттарының акша-хөреңгизи болгаш күжү-биле улуг эвес клубтарны дээш өске-даа социал объектилерни тудуп ап турарлар. Ооң чижээнге Куран суурну адап болур.
Тываның эрге-чагыргазы бичии суурларже социал кичээнгейни салып, оларның хөгжүүрүн деткип турар. 2022 чылда Успенка суурга көдээ клубту тудуп доозуп, ону декабрь айда ажыглалга киирген. Бо культура одаа тус черниң улуг-бичии чурттакчыларының чыглыр ынак чери апарган. Таңды кожууннуң хүндүлүг чурттакчызы Маадыр-оол Шыырапович Успенка суурга клубту ажытканы тус чер чергелиг төөгүлүг болуушкун деп санап чоруур. Ооң бажыңы клуб чоогунда болгаш, ол культура одаанда хайнып турар хөй-ниити болгаш культурлуг болуушкуннарга хоочун боду, ооң ажы-төлүнүң авазы идепкейлиг киржип турарлар.
Бистиң корр.