Бо чылдың мартта Шагаан- Арыгның тус чер чылыдылга төвүнге частыышкындан үрелген котельнаяның орнунга чаа тудугну тудар. Тываның Баштыңы Владислав Ховалыг эрге-чагырганың ол талазы-биле шиитпирин дыңнаткан. Техниктиг даалга белен, специалистер чаа котельнаяның төлевилел-санаашкын саавырларын ажылдап кылырын эгелээн.
Шакта-ла 50 гигакалорий күчүлүг боор чаа объектини хоорайның бурунгаар хөгжүлдезин барымдаалап кылыр. Объектини амгы технологияларның ачызында кыска үеде тудуп үндүрер: төлевилел-санаашкын документилерин алды ай иштинде кылыптарга, тудугнуң бодун бир чыл хире тудар.
«Амгы үеде одалга сезонунга белеткел ажылдары Шагаан-Арыгның эрги ЧЭТ-те эгелээн. ЧЭТ дараазында кышта бүзүрелдиг болзун дээш, бүгү дериг-херекселдерни үндезини-биле септеп, шыңгыы контрольга алыр»– деп, регионнуң удуртукчузу демдеглээн.
Херек үеде кончуг дүрген ажылдадыптар сес көжүп чоруур котельнаялар Шагаан- Арыгда барын сагындыраал.
Төлевилел-санаашкын саавырларының ажылдарын республиканың акша-хөреңгизи-биле кылыр: регионнуң бюджединден 50 сая рубльди ол сорулгаже үндүрген. Баш бурунгаар санаашкыннардан алырга, котельная тудуунга бир миллиард хире рубль херек. Регионнуң Чазаа РФ-тиң Тудуг яамызының шугуму-биле федералдыг деткимчеже кордап турар.
ТР-ниң Чазааның парлалга албанының медээлеринден.
“Шын” №39 2024 чылдың май 29