Тываның культура адырында национал төлевилелдер деткимчези-биле чаартылгалар уламчылап турар.
Июнь айның эгезинде ТР-ниң культура сайыды Виктор Чигжит дөрт кожуун – Улуг-Хем, Чеди-Хөл, Сүт-Хөл болгаш Чөөн-Хемчикте культура объектилеринде национал төлевилелдер-биле чортуттунуп турар капиталдыг септелге ажылдарын хынап четкен.
Сүт-Хөлдүң Бора-Тайга суурунда Улусчу театрда “Өг-бүле” национал төлевилел-биле капиталдыг септелге уламчылап турарын ол көрген. Объектиде чоруттунуп турар бүрүн септелге ажылы барык доостурунуң кырында, 95 хуузу кылдынган. Ажыл график ёзугаар чоруп турар. Суурнуң чаарттынган Улусчу театры көрүкчүлеринге бо чылын эжиин ажыдары манаттынып турар.
Улуг-Хем кожууннуң Арыг-Үзүү суурунда “Сорунза” губернатор төлевилели-биле чаа Культура бажыңының, ном саңының тудуу чоруп турар. Культура сайыды тудуг материалдарының чедер-четпезин болгаш чоннуң тудуунда тургустунуп турар нарын айтырыгларны сайгарып чугаалашкан.
Оон аңгыда сайыт “Көдээ черлерниң комплекстиг хөгжүлдези” күрүне программазы-биле Шагаан-Арыг хоорайда 150 олуттуг чаа туттунуп турар уругларның уран чүүл школазының тудуун хынап көрген. Тудугну ооң хүлээникчи организациязының даргазы көрдүнген хуусаадан орайтатпайн дужаар дээнин сайытка дыңнаткан. Улаштыр Шагаан-Арыг хоорайда уругларның ном саңының баазазында “Өг-бүле” национал төлевилел-биле туттунуп турар модельдиг библиотекага четкеш, хынап көрген.
Ол-ла ажыл-агыйжы сургакчылаашкын хүннеринде Чеди-Хөлдүң Сайлыг суурунда чаа Культура бажыңының тудуунуң эгелеп турарын көрген. “Сорунза” губернатор төлевилели-биле тудуп эгелээн 150 олуттуг көрүкчү залдыг чаа Культура бажыңынга 56 дөрбелчин метр ном саңы база турар дээрзин сагындыраал.
Чадаана хоорайга Виктор Чигжит Тываның национал музейиниң салбыры Монгуш Буян-Бадыргы аттыг төөгү болгаш чурт-шинчилел музейинге четкен. Ында “Өг-бүле” национал төлевилел деткимчези-биле капиталдыг септелге чорудуп турар хүлээникчи организацияның тудугжулары-биле ужурашкан. Ажыл план ёзугаар үзүктелиишкин чок уламчылап турарын сайыт көрген. Ол чоруй, культура сайыды С. Шойгу аттыг музей-бажыңга кирген. Сагындырып каар чүүл, мемориалдыг музей “Культура” национал төлевилел ачызында чаа үениң музейлерге салыр дериг-херекселдери болгаш эт-сеп-биле четчеленген.
Аңгы-аңгы кожууннарда культура албан черлериниң чаартылгаларынга үстүнде киирген национал төлевилелдер дыка улуг деткимчени көргүзүп турар деп, сайыт чугаалаан. Ол бүгү ажылдың түңнелинде, республиканың чурттакчыларының амыдырал-чуртталгазының шынары экижииринден аңгыда, көдээниң культура албан черлери чонну бодунче хаара тудар болгаш өзүп олурар салгалга өгбелерден дамчып келген ёзу-чаңчылдарын, культурлуг өнчүзүн кадагалап арттырарынга улуг рольду ойнаар дээрзин сайыт демдеглээн.
Бистиң корр.
Чурукту ТР-ниң Культура яамызындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...