Каа-Хем суурнуң чөөн талазынга “Радиостанция” деп чаа микрорайон туттунар. Тудугнуң бир дугаар чадазы дөрт 5 каът бажыңнардан эгелээр. Бажың бүрүзүнге-ле 40 аал чурттаар. Суурнуң чагырга даргазы Омак Ондарның чугаалап турары-биле алырга, бажыңнарның овур-хевири кончуг чараш, амгы үениң негелделеринге дүгжүп турар болур.
2037 чылга чедир микрорайонга чада аайынче 37 хөй аал чурттаар бажыңнар, 34 таунхаус болгаш 7 ийи аал чурттаар бажыңнар тудар сорулганы салган.
Оон аңгыда, микрорайоннуң төлевилелинде 616 олуттуг школаны, 280 олуттуг 2 уруглар садын тудары көрдүнген. Кайы-даа албан чериниң немелде өөредилгези хөгжүм болгаш уран чүүл талазы-биле угланыышкыннарлыг болур. Ол ышкаш культура бажыңнары, музей экспозициялары салыр делгелге залдыг ном саңнары, күш-культураның кадыкшылга комплекизи, ажык стадион, эмнелге комплекизи, автошкола, хөй хүлээлгелиг төп, садыг төвү болгаш садыг база турар. Социал объектилерни 2029 чылга чедир туткаш, ажыглалче киирер.
Ооң-биле чергелештир Каа-Хем суурга “Преображенский” деп адаар база бир микрорайон тургустунар. Ооң девискээринде школа болгаш спортчу болгаш культурлуг төп тудуглары дооступ турар. Ол дугайында Тываның Баштыңы Владислав Ховалыг тудуг объектилерин хынап четкениниң түңнелинде, дыңнаткан.
Чаа микрорайоннарны хандырары-биле, суурнуң канализациязының күжүн улгаттырар.
Бистиң корр.
“Шын” №76 2024 чылдың октябрь 5