Тываныӊ Өөредилге яамызыныӊ чагыы-биле «Просвещения» парлалга бажыӊынга парлаан өөредилге номнарын республикада эккелген.
Федералдыг өөредилге стандарттарыныӊ негелделери-биле чаарттынган 34 муӊ өөредилге номнарын бо чоокку үеде школаларга хувааштыр үлээр.
Республикада чылдыӊ-на өөреникчилер саныныӊ көвүдеп турары-биле өөредилге номнары база чедишпейн баар. 2022–2023 өөредилге чылыныӊ төнчүзүнде ук яамы школаларныӊ ном-дептер-биле хандыртынганын хынап турган. Республикада, ортумаа-биле алырга, школалар 85 хуу хандыртынган болган. Рейтингиниӊ көргүзүглерин барымдаалап, 26 272 номну 126 школага үлээр деп шиитпирлээн.
Өөредилге номнары шуут чедишпейн турар школаларга Кызыл хоорайныӊ, Бии-Хем, Кызыл, Барыын-Хемчик кожууннарныӊ школалары хамааржыр.
Тываныӊ кадеттер корпузунга 1–11 класстарныӊ шупту эртемнериниӊ чаа номнарын бээр. Үндезин септелге кылып турар 13 школаны чаа өөредилге номнары-биле хандырар.
Шуй суурнуӊ санаторий школа-интернадыныӊ 1–9 класстарыныӊ өөреникчилери чаа өөредилге номнарын алыр. Тускай бөдүүнчүткен программа-биле тургускан 900 номну Кызыл, Ак-Довурак хоорайларныӊ, Черби, Кызыл-Арыг суурларныӊ коррекциялыг школаларынга бээр.
Тывада 166 школа библиотеказы ажылдап турар. Оларныӊ 77 хуузу — көдээ суурларда, 23 хуузу — хоорайларда. Өөредилге организацияларыныӊ библиотека фондузунда 1 355 446 номнар болгаш өөредилге пособиелери бар дээрзин эрткен өөредилге чылы дооступ турда санап үндүрген.
Школаларныӊ библиотека фондузунга бо чазын 55 млн ажыг рубль өртектиг 89 040 өөредилге ному немешкен. Кол-кол эртемнерниӊ федералдыг өөредилге стандарттарыныӊ негелделери-биле чаартып кылган номнарны 162 школага апрель, май айларда берген.
Тыва Республиканыӊ Чазааныӊ медээлеринден Р. ДЕМЧИК белеткээн.
"Шын" №59, 2023 чылдың август 9