Чаа школа тудуглары кидин-түлүк чоруп турар

“Өөредилге” национал төлевилелдиң ачызында бо чазын республикага 2 чаа школа ажыттынган. Оларга Кызыл хоорайның Бай-Хаакская кудумчузунда болгаш Кызыл кожууннуң Сукпак суурунда школалар хамааржыр.

Чаа өөредилге чылының эгезинден тура ам-даа чаа өөредилге черлери ажыттынар. Ниитизи-биле “Өөредилге” национал төлевилел-биле 8 школа тудуу чоруп турар.

Кызыл хоорайда “Мөңгүн” девискээринге 825 олуттуг школаны чыл төнчүзүнде ажыглалче киирер. Амгы үеде иштики ажылдар чоруп турар. Ол ышкаш Спутник девискээринге база-ла 825 олуттуг школа ажыттынар. Ук оран-саваның боду болгаш даштыкы ажылдары доостур четкен. Амгы үеде иштики ажылдар болгаш долгандыр турар девискээрин чаагайжыдар ажылдар эгелээн.

Таңды кожууннуң Балгазын суурда 616 олуттуг чаа школаны 2024 чылдың ноябрь айда ажыглалче киирер. Ук школаның иштики ажылдары доозулган, долгандыр девискээрин чаагайжыдар болгаш ногаанчыдар ажылдар уламчылап турар.

Таңдының Бай-Хаак суурда 825 олуттуг школаны база-ла Балгазынның школазы-биле деңге дужаар. Бо школа Тывада амгы үениң негелделеринге дүүшкен көдээ школалар аразында эң-не улуг школа болур. Амгы үеде чаагайжыдылга болгаш аштап-арыглаар ажылдар чоруп турар.

Кызыл кожууннуң хоорайжыткан Каа-Хем суурда 825 олуттуг школа тудуу 50 хуу кылдынган. Ук школаның онзагай талазы спортчу угланыышкынныг. Амгы үеде оран-саваның иштики ажылдары чоруп турар.

Ыраккы Мөңгүн-Тайга кожууннуң Кызыл-Хая суурунда 176 олуттуг школа тудуу чоруп турар. Школа боду суг сордурар пунктулуг, котельнаялыг, дизель, генераторлуг болур. Оран-саваның тудуп үндүрүп, иштинде электри болгаш чылыг инженер четкилерин салып турар.
Чөөн-Хемчик кожууннуң Чадаана хоорайда 616 олуттуг школа тудуунуң 3 дугаар каъдын дуглаар, ханаларын тудуп үндүрер ажылдар чоруп турар. Суг дамчыдылгазын болгаш канализациязын база кылып эгелей берген.

Улуг-Хемниң Чодураа суурда 176 олуттуг школаның цоколь каъдын кылып дооскан. Бир дугаар каъттың ханаларын болгаш серизин кылып турар.

“Тывада ниитизи-биле 8 чаа өөредилге чериниң тудуглары чоруп турар. Найысылал Кызылга-даа, суурларга-даа школаларны тудар бис. Уруглар чаа дериг-херекселдерлиг таарымчалыг байдалга эртем-билиг чедип алзын дээш, бүгү-ле болдунар аргаларны ажыглаар бис” – деп, Тываның Баштыңы Владислав Ховалыг демдеглээн.