Таңды кожууннуң чагырга даргазының албан-хүлээлгезин күүседип турган Алексей Викторович Сазан-оол ам Тыва Республиканың Чазааның Даргазының оралакчызының хүлээлгезин күүседир. Тываның Чазааның Аппарат хуралында кадрларда томуйлаашкынны дыңнаткан. Алексей Сазан-оол республиканың өөредилге, спорт, аныяктар политиказын удуртуп-башкарар.
Алексей Сазан-оол 1986 чылдың апрель 18-те Тыва Республиканың Чеди-Хөл кожууннуң Хову-Аксы суурга төрүттүнген. Тываның күрүне университединге «Юриспруденция» эртемин чедип алган.
Алексей Сазан-оолдуң күш-ажылчы ажыл-чорудулгазы колдуунда Чеди-Хөл кожуунга эрткен. Аңгы-аңгы чылдарда кожууннуң чагырга даргазының амыдырал-хандырылга айтырыгларының талазы-биле специалист, ооң соонда оралакчызы болуп ажылдаан. «Уют» КХН компанияның удуртукчузу турган. Өөредилге албан черлеринге удуртукчу ажылдарга ажылдаан: Сайлыг ортумак школазының директорунга база Чеди-Хөл кожууннуң өөредилге эргелелин начальниктээн. 2023 чылдан 2025 чылга чедир Чеди-Хөл кожууннуң Төлээлекчилер хуралының даргазы– кожуун баштыңы болуп ажылдаан. 2025 чылдың февральдан эгелеп Таңды кожуун чагыргазының даргазынга ажылдап, бодун шыырак, харыысалгалыг удуртукчу кылдыр көргүскен.
Алексей Викторович өг-бүлелиг, үш ажы-төлдүг.
Чаа томуйлаткан оралакчы дарга Тыва Республиканың өөредилге, спорт болгаш аныяктар политиказы адырларын харыылаар. А кадык камгалалы, күш-ажыл болгаш ажылга хаара тудары, культура адырлары Орлан Сарыгларның харыысалгазында артып калган.
Медээни болгаш чурукту Тываның Чазааның парлалга албанындан алган.
“Шын” №37 2025 чылдың сентябрь 25Оценили 26 человек