Аныяктар херектериниң талазы-биле агентилелди яамы кылдыр катап эде тургузуп тура, сайыттың албан-дужаалынга кордакчы Субудай Оюнну деткээнин Тываның Баштыңы Владислав Ховалыг дыңнаткан. Субудай Оюн мооң мурнунда республиканың спорт сайыдының оралакчызынга ажылдап турган. Аныяктар-биле сырый кады ажылдаар даалганы чаа удуртукчуга берген.
Владислав Ховалыг эрткен пятницада ТР-ниң Дээди Хуралынга Айыткалында Аныяктар херектериниң талазы-биле агентилелди яамы кылдыр эде тургузары эргежок чугула апарганын дыңнаткан турган.
– Чурттакчы чоннуң демографтыг көргүзүүнден алырга, ол «аныяксаан» болганда, ажыл-чорудулганың мурнады боттандырар угланыышкыннары аныяктарның хереглелдеринге дүүшкен турар ужурлуг. Күш-ажылды суртаалдап, идепкейжи болгаш инициативтиг аныяктарны деткиир – деп, бодунуң шиитпирин ол чарлаан.
Судубай Викторович Оюн 1990 чылдың август 18-те Тес-Хем кожууннуң Самагалдай суурга төрүттүнген. Уралдың күрүнениң юридиктиг академиязын тергиин өөредилгелиг дооскан. Чеди чыл иштинде мергежилиниң аайы-биле юристеп ажылдаан. Күрүне эрге-чагырга системазында дөрт чыл ажыг ажылдап турар.
Владислав Ховалыг чаа албан-дужаалга чедиишкиннерни, идепкейжи болгаш инициативтиг ажылдаарын аңаа күзээн.
«Шын» №5 2024 чылдың январь 24