Кызылдың Кечил-оол кудумчузунда Уруглар эмнелгезиниң чанында девискээрни республиканың уруглар эмнелгезиниң чаа оран-савазының тудуунга белеткеп эгелей берген. Чыдар эмнелгелиг база поликлиникалыг Уругларга медицина комплекизиниң чаа оран-савазын 2024 чылдың төнчүзүнге чедир тудар. Төлевилелди «Уругларның кадык камгалалының хөгжүлдези» деп федералдыг программаның иштинде ажылдап кылган болгаш камгалаан.
Төлевилелде 150 оруннуг база ийи хирургия залдыг улуг эмнелге кирип турар. Тудуг доостурга, Республиканың 1 дугаар эмнелгезинде уруглар хирургиязының салбыры база чаа оран-саваже шилчиир.
Тудуг объектизинче база төлевилелди ажылдап кылырынче 1 949 448,74 муң рубль көрдүнген, ооң 1 900 000,0 муң рубли федералдыг, 49 448,73 муң рубль республика бюджединден, ооң иштинде 30 256,82 муң рубль – төлевилелди ажылдап кылырынче көрдүнген. 2024 чылдың төнчүзүнге чедир тудуг доостур ужурлуг.
Тудугнуң төлевилелин ажылдап кылгаш, экспертизага Чаңгыс аай чурагайлыг платформа шөлүнче киирген. Тудуг объектизин «Восток» КХН хүлээнип алган, төлевилелди «Сибпромгрупп» АН ажылдап кылган.
/ Бистиң корр.
"Шын" №37 2023 чылдың май 23