Сүт хоюу-биле кылган паста
Эртежик сагындырып каары артык эвес: паста дээрге диш-чуур-даа эвес, томат-даа эвес, бо удаада итали дылдан үлегерлээн макарон аймаандан чем-дир ийин. Чуду-каралап өөренген аайывыс-биле эътти согуна, чеснок-биле катай үске быжыргаш, кырынче хайындыргаш, сыскап каан макарон аймаан каапкаш, холуй былгап алыр болгай бис. Томат паста азы кетчуп-биле кызыдып алырынга ынаавыс база кончуг. А бир эвес ону сүт хоюу-биле кылып чиир болза, оон-даа чаагай болур. Канчаар кылырын сүмелеп тур бис, шенеп көрүңерем.
Кызыл-тастың кадыг сортундан кылган «А» бөлүктүң макарон аймаандан спагетти, фетучини азы оон-даа өскезин дузап каан сугга хайындыргаш, шүүреп алыр. Кырынче соок суг кутпас! Чүге дээрге соузу эки холужуп, чедингир болуру оон хамааржыр.
Сковородага үнүш үзүн куткаш, доорап каан чеснокту саргартыр быжырыпкаш, шүүреп кааптар.
Чеснок быжырган чаагай чыттыг үске доорап каан дагаа эъдин былгавышаан, быжырар. Дус болгаш перецти каап алыр. Болур үези чоокшулап олурда, садыгларда садып турар 20 хуу азы 33-35 хуу «Сливки» деп бижиктиг 200 милилитр сүт хоюун ооң кырынче кудупкаш, одун эвээжеткеш, 3-5 минута иштинде былгавышаан хайындырар.
Пармезан азы өске-даа кадыг быштакты дүрбүүшке үүрмектеп алгаш, сүт хоюу-биле хайнып турар эъттиң кырынче урупкаш, былгаар. Соус митпее бээрге, кырынче шүүреп каан макаронну урупкаш, холуштур былгаар. Эскеш, тавактарга салыр. Шампиньон деп мөөгүнү база эът-биле кады быжырып ап болур. Болу берген чем кырынче доорап каан ногаа аймаан күзели-биле салып алыр.
Кайы хире чемни ажыглаары каш кижиге кылырындан хамааржыр болгаш дус, перецти бодунуу-биле каап алыр.
Лагман
Лагман – сонуургап кылып чииривис Төп Азия чоннарының тодуг чеми. Бөдүүнү-биле чугаалаарга, үскен далганны ногаа-биле катай үске хаарып каан эътке холуп кааны болур. Ону кылырының эң бөдүүн аргазы мындыг:
Эътти дөрбелчинней, согунаны чартык төгериктер кылдыр, морковь болгаш редьканы узун чиңге кылдыр, болгар перецти шала чоон кылдыр шөйбейтир, а помидорну дөрбелчин кылдыр доорап белеткеп алыр. Чеснокту бичии кылдыр хээпкеш, көк-кулча, укроп, петрушка чергелиг ногаа аймаан бичии-бичии кылдыр доорап алыр.
Казанга азы дүвү кылын сакпыңга үстү изиткеш, баштай согунаны уруптар. Ол кылагар апаарга, эътти урупкаш, былгавышаан быжырар. Зира биле борбак горох хевирлиг кара перецти каапкаш, чаагай чыдын үндүр былгавышаан, морковь болгаш редьканы уруптар. 5-7 минута дургузунда хайындыргаш, болгар перец биле помидорну кырынче урупкаш, улаштыр 5-10 минута иштинде кылыр. Ооң кырынче суг азы эът хайындырган мүннү кудупкаш, аксын хаггаш, одун эвээжеткеш, эъди чымчагыже, 30-45 минута дургузунда хайындырар. Эң сөөлүнде дузааш, чеснок биле хоюдур соктап каан кориандрны каар. Лагманның бо кезээн ваджа дээр. Ол митпек, ынчалза-даа мүннүг болур ужурлуг.
Чылыг суг, дус, дагаа чуургазы-биле бодуңарның нугуп алган далганыңарны чугаладыр өйгеш, кевип, кургап чыдар кылдыр чадып каар силер. Кургаг далганны ийи талазынга чажып алгаш, лапшаны кезип алыр. Далган-үскенивис-тир ийин але, үскен далган. Ону хайнып турар дузап каан сугже ургаш, хайны бээрге, шүүреп алыр.
Оңгар тавактар азы хува аяктарга үскен далганны салгаш, кырындан эъттиг, ногаалыг ваджаны салыр. Мүнүн көвүдедир кудуп болур.
Лагманның амдан киирер кол специялары – зира биле кориандр. Ажыг чемге ынак улус чилини ажыглап болур. Лазджан деп чесноктуг ажыг соусту база аңгы каап ап болур.
Чемиңер чирттингир болзун! Өг-бүлеңерни чаагай чем-биле өөртүп көрүңерем.
Чуруктарны ГигаЧатка чураан.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn