Август 22-де Тыва Республиканың Баштыңы Владислав Ховалыг Моол-биле кызыгаарда «Хандагайты» эрттирилге черинде чаартылга ажылдарын хынап чораан.
«Улуг кылыгларның эптелгези ам безин доозулган. Капитал тудугнуң объектилерин тудуп турар. Суг хандырылгазының, суг аңгылаштырылгазының системалары белениниң шугумунда келген» – деп, бодунуң блогунда Владислав Ховалыг дыңнаткан.
Ол-ла черге республиканың Баштыңы адыр аайы-биле удуртукчулар-биле чидиг айтырыгларны чугаалажып, оларны шиитпирлээриниң эң-не таарымчалыг аргаларын сүмелешкен. Дараазында ээлчегде санитар-карантин черин тудары, пассажирлерге таарыштырган оран-саваны чаартыры көрдүнген. «Хандагайты» хөй эрттирилгелиг черни ажылдадып киирери – Сибирьден Моолче база Кыдатче транспорт коридорун тургузарының кол чылдагааны болур» — деп, Владислав Ховалыг медеглээн.
Ук төлевилелге моол болгаш кыдат таладан партнёрлар сонуургалдыг дээрзин ол айыткан. Төлевилелден манап турары ажык-дүжүү – Тывага-даа, Сибирьге-даа сайгарлыкчы чорукка чаа тынышты бээри. «Хандагайты – Боршоо» эрттирилге чериниң чаартылгазы 2022 чылда-ла «Россия Федерациязының күрүне кызыгаары» тускай сорулгалыг федералдыг программаның иштинге-ле эгелээн. «Урумчи (Кыдат) – Ховд (Моол) — Улангом (Моол) – Хандагайты (Россия)» аразында чурттар аразының автомобиль оруунуң тудуунуң доозулганы ук ажыл-хемчеглерниң эгезин салырынга идиг болган. Моол Боршоо эрттирилге черинге чурттар аразының эрге-байдалын тывыскан. Сөөлүнде барып ол хондур-дүндүр ажылдаар апаар болгаш ону таварыштыр чүък аргыштырылгазы каш катап калбарар, чүък долдурулгазының үези база каш катап кызырлыр, а хамаатылар кызыгаар эртер чөпшээрел манап турбас апаар.
А. ХЕРТЕК белеткээн.
Чуруктарны интернет четкизинден алган.
“Шын” №64 2024 чылдың август 24