Чаартылгалар хөй

ПАРЛАЛГА КОНФЕРЕНЦИЯЗЫ

Росреестр 15, а өнчү-хөреңги бүрүткээр күрүне албан чери тургустунгандан бээр 25 чыл болган оюн бо хүннерде демдеглеп турар.

Ол хире үениң дургузунда Тыва Республикада Росреестр эргелелинде болгаш ТР-ниң өнчү-хөреңги бүрүткээр албан черинде ниитизи-биле 258 муң ажыг шимчевес өнчү дугайында медээ бар, ол ышкаш ында 568 муң хууда өнчү-хөреңги бүрүткеттинген. Декабрь 25-ти Россияга чоннуң шимчевес өнчү-хөреңгизинге хамаарышкан бүрүткел кылыр кижилерниң хүнү кылдыр доктааткан. 2008 чылдың декабрь 25-те Росөнчү-хөреңги, Роскартография, Росбүрүткел деп үш аңгы албан черин каткаш, Росреестрни тургускан.

Росреестрниң Тыва Республикада эргелелиниң удуртукчузу Светлана Түлүштүң медеглээни-биле алырга, 25 чыл дургузунда ук организацияның ажылы эки талаже өскерилген. Шимчевес өнчү-хөреңги бүрүткедир үени кызырары-биле күрүне ачы-дуза порталын ажылдап кылган.

«Он беш чыл бурунгаар шимчевес өнчү бүрүткедиринге 1-2 ай негеттинип турган болза, амгы үеде 24 шактан эртпес үе негеттинер апарган» – деп, Светлана Түлүш демдеглээн.

Роскадастрның салбыры Росреестрниң ажыл-чорудулгазынга идепкейлиг киржип турар. Ук салбырның директору Леонид Дамдынның чугаазы-биле алырга, ооң мурнунда чер кадастрын саазынга кылып турган. Ажыл берге-даа болза, ынчангы ажылдакчылар бүгү сагыш-сеткилинден бердинип ажылдап турган. Чер документизин кылып, чоннуң хереглелин чогуур үе-шаанда хандырып, боттарының билиин улам бедидип, дуржулгазын улгаттырып турган.
Бо хүннерде республика девискээринде Шимчевес өнчү бүрүткээр күрүнениң чаңгыс аай реестриниң (ЕГРН) баазазында 190 муң шимчевес өнчүнүң дугайында чугула медээлер бар. Сөөлгү чылдарда документини электроннуг хевирге ап болур апарган. 2023 чылда өнчү-хөреңгиге хамаарышкан медээ дилээн чагыгларның 94 хуузу электроннуг хевирге келген.

А.ОНДАР.
Ада ТЮЛЮШТУҢ тырттырган чуруу.

«Шын» №100 2023 чылдың декабрь 30