Тываның Баштыңы Владислав Ховалыг ажыл-агыйжы сургакчылаашкын үезинде Чадаанада чаа школаның тудуун хынап көрген. РФ-тиң «Өөредилгениң хөгжүлдези» күрүне программазының иштинде «Школа назыны четпээн болгаш ниити өөредилгени хөгжүдери» программаның «Амгы үениң школазы» деп федералдыг төлевилел күүселдези-биле объектиде тудуг ажылдарын чорудуп турар.
Үш каът школа ниитизи-биле 13 муң ажыг дөрбелчин метр шөлдүг, чырык болгаш делгем класстарлыг, ону чаа эт-сеп, амгы үениң өөредилге дериг-херекселдери-биле дерээн база улуг залдыг, 180 олуттуг столоваялыг, ийи спортчу залдыг болгаш бир тренажёр залдыг. Школаның девискээринде көрүкчүлерге ийи трибуналыг стадионну туткан. Оон аңгыда камгалал болгаш дыңнадыг системалары база автоматтыг өрт медээчизи-биле чепсеглеттинген.
Владислав Ховалыг школа тудуун «Өөредилге» национал төлевилелдиң күүселдези-биле боттанган «Аныяктар болгаш уруглар» деп чаа национал төлевилелдиң ажылы-дыр деп демдеглээн. Тудуг ажылдары адакталган, чаа өөредилге чылында школа ажылдап эгелээр дээрзин республика Баштыңы демдеглээн.
Керээ ёзугаар «Восток» КХН тудуг ажылдарын чорудуп турар. Объектиде 250 ажылчын болгаш 10 санныг тудуг техниказы хаара туттунган. Амгы үеде кошкак токтуг системаларны эптеп, сантехниктиг дериг-херекселдерни кожуп тургузуп, мебельдерни болгаш өөредилге дериг-херекселдерин салып турар. Школа девискээрин чаагайжыдып, херимнеп, котельнаяның участогунда асфальт-бетон шывыгны салып турар.
Чадаана хоорайның Тиилелгениң 40 чылы кудумчузунда, эргиде автотранспорт бүдүрүлгези турган черде, чаа школаны туткан. Хоорайның ол кезек девискээри ам-даа хөгжүп, чадаанажыларны хаара тудар төптериниң бирээзи апаар боор деп Владислав Ховалыг бүзүрелин илереткен.
Россия Федерациязының Президентизи Владимир Путинниң эгелээшкини-биле республикада болгаш бүгү чуртта чаа үениң школалары туттунуп турарын Тываның Баштыңы сагындырган. «Удавас Кызыл кожууннуң хоорайжыткан Каа-Хем суурунга, Таңдының Бай-Хаак, Улуг-Хемниң Чодураа суурларынга база Кызыл хоорайның ийи микрорайонунга чаа школалар ажыглалче кирер. Бистиң ажы-төлүвүс эки байдалдарга эртем-билигни чедип алыр ужурлуг» – деп, республика Баштыңы онзалап демдеглээн.
А. МОНГУШ.
Александр ЕНЗАКТЫҢ тырттырган чуруктары.
“Шын” № 30 2025 чылдың август 7