Чагыдып алыкчының күзели-биле

Чөөн-Хемчик кожууннуң Чыраа-Бажы сумузунда ажыл-биле бот-хандыртынган сайгарлыкчыларның бирээзи – Шеңне Донгак. Ол кондитер кылыгларының биче бүдүрүлгезин ажыдып алган.

Шеңне “узун шөлээге” тургаш Кызылга торт болгаш кондитер кылыгларын быжырып өөренип алган. Чыраа-бажыжылар эгелеп чоруур сайгарлыкчының амданныг торттарын байыр-найыр, куда-дой, төрүттүнген хүннер үезинде күзелдии-биле чагыдып алыр апарган. Ол чагыдып алыкчының күзели-биле торттарны чогаадыкчы каастап, кандыг-даа хевирлерни быжырып турар.

Кондитер кыс бир чыл бурунгаар “Социал керээ” программазынга киришкеш, күрүне деткимчезиниң ачызында акша-төгерик ажылдап алыр аргалыг болган. Ол чаңгыс чер-чурттугларын амданныг торттары болгаш янзы кондитер кылыглары-биле өөртүп турар.

ТуваМедиаГрупп