Тыва Республиканың Культура яамызы "Тус черниң культура ажылдакчызы" программага киржиринге чагыгларны хүлээп ап эгелээнин чарлаан. Бо программаның негелдези ёзугаар, "Тус черниң культура ажылдакчызы" программага киржириниң шилилгезин эрткен көдээ культура ажылдакчызынга 1 миллион рубль хемчээлдиг чаңгыс удааның төлевирин бээр.
“Чурттуң Президентизи Владимир Владимирович Путинниң бот-идепкейи-биле боттандырып эгелээн "Тус черниң культура ажылдакчызы" программа-биле чаңгыс удааның төлевирин бээриниң чурумун Тываның Чазааның доктаалы-биле бадылаан. Бо программа бистиң көдээ суурларывысче культура специалистерин хаара тударынга, көдээ культура инфраструктуразын хөгжүдеринге дузалаар” — деп, Тываның Баштыңы Владислав Ховалыг бодунуң блогунда ооң мурнунда демдеглээн.
Программаның кол сорулгазы — чурттакчы чонунуң саны 50 муң чедир чурттакчылыг черлерге ажылдап барган культура ажылдакчыларын деткиири. Конкурс шилилгезин эрткен киржикчилерге чаңгыс удаа бээр төлевири — 1 миллион рубль. Чаңгыс удааның төлевирин алган культура ажылдакчызы көдээде культура одаанга 5 чылдан эвээш эвес үе дургузунда ажылдаар хүлээлгелиг.
Конкурска киржириниң чагыгларын республиканың Культура яамызы 2025 чылдың апрель 15-тен июль 15-ке чедир хүлээп алыр. Конкурстуң тиилекчилерин комиссия август 15-ке чедир тодарадыр. Сентябрь эгезинге чедир оларның-биле күш-ажыл керээзин чарар. Чаңгыс удааның 1 миллион рубль түңнүг деткимче акшазын ноябрь айдан орай эвес хуусаада культура ажылдакчызынга төлеп бээр ужурлуг.
Ш.МОНГУШ белеткээн.
Чурукту интернеттен алган.
“Шын” №13 2025 чылдың апрель 10