Кызылдың 9 дугаар гимназиязынга каратэ спортунуң шотокан хевиринге Кызыл хоорайның бирги чери дээш спортчу маргылдаа болган. Аңаа Кызыл хоорайның 16 дугаар лицейи, 18 дугаар ортумак школазы, Бии-Хем болгаш Тожу кожууннарның школаларындан каратэ спортун сонуургап чоруур болгаш шыырак спортчу белеткелдиг уруглар, оолдар кээп киришкен.
Маргылдаа эгелээр мурнуу чарыында каратэниң камгаланыр болгаш күш-дамыр белеткелин бадыткап турар уран аргаларын аныяк спортчулар калбак манзаларны сый шанчып, теп тургаш, көргүскен.
Ооң-биле чергелештир Кызыл хоорайның Адалар чөвүлелиниң даргазы Алексей Артык-оол Кызылдың 9 дугаар гимназиязынга хөй чылдар дургузунда каратэ спортун сайзырадып, школачыларны өөредип чоруур тренер башкы, ук школада Адалар чөвүлелиниң даргазы, ажы-төлүнүң үлегерлиг адазы Хүреш Кыргыска Хүндүлел бижикти байырлыг байдалга тывыскан.
Эң бичии спортчу 7 харлыг, эң улуу 17 харлыг каратэжилерниң чидиг демиселиниң түңнелинде 16 дугаар лицейден Сурат Хомушку, 9 дугаар гимназиядан Айнур Байкара, Арыяа Очур-оол, Алдын-Сай Сымчаан-оол, Кызылдың 18 дугаар ортумак школазындан Чаяан Монгуш, Санчай Ховалыг болгаш оон-даа өске спортчулар шылгарап үнген. Тиилекчилерге хүндүлел бижиктерни база өртектиг белектерни тывыскан.
Мерген ОНДАР.
Авторнуң тырттырган чуруктары.
«Шын» №18 2025 чылдың май 15