Бичиимден тура бижиттинер чаңчылдыг мен. Студент чылдарымда-ла бижип турган хөй-ле бижимелдеримни, шүлүктеримни кылын блокнотка чыып турдум. Берт-Даг школазынга ажылдап турумда ол блокнодумну бир өөреникчим дилеп алгаш, ол-ла хевээр чидириптим дээш, бербейн барган. Ол блокнодумга дыка солун, каттырынчыг, чаптанчыг-даа шүлүктерим турган, дыка харааданчыг.
1962 чыл ирги бе, институтка курстар аразынга концерт чарлаан. Ынчан Юрий Гагаринниң октаргайже ужудуп үнген үези чүве. Бистиң группаның удуртукчузу Елизавета Ивановна Коптева. Мен Юрий Гагарин дугайында баштак кожамыктар чогаадып алган мен. Концерт-даа эгелээн.
Студентилер зал долу. Хөгжүм башкызы дыка чараш, дыдыраш баштыг Панов дээр башкы чүве. Каш-даа бөлүк номерлерин күүседип каапкан. Бистиң бөлүк база солун концерттиг бис. Сцена кырынга кожамыктар ырлап турувуста, бөлүүвүс уруглары каттырышкаш туруп берген. Ырлап чадап каан бис. Бүдүн зал чир-шоң дүшкен. Ол күүселдевис будап алган бис. Елизавета Ивановна: «Такой номер провалили!» – дээш, биске дыка хорадаан. Чүү дээр ону, аныяк назын-дыр ийин.
Бойдус биле кижи тудуш –
Бодалдарың, ынакшылың,
Бодарадыр күзелдериң
Бойдузуңдан төрүттүнер.
Частың, күстүң дүжери-даа
Чаагай сеткил тывылдырар,
Дүнеки айның херелдери
Дүлгээзинни хөделдирер.
Өйлеп берген чуртталганың
Өөрүшкүзү, муңгаралы,
Өл-ле чаштың ыызы-даа
Өпей ырда сиилбиттинген.
Чалыы назын ырай берди,
Чараш-силии имистелди,
Тааланчыг ырлары-ла
Таңма болуп артары ол бе?
/ Алдын-кыс САРЫГЛАР.
Кызыл хоорай.