Александра Куулар 2023 чылдың август айдан тура дайынчы хөделиишкиннерде ажылдап, балыгланган шериглерни эмнеп турар.
Тускай шериг операциязының мурнунда Александра Куулар Красноярскының эмнелгезинге кезер эмчи сестразы болуп ажылдап турган. Эрткен чылдың август айда Россияның Камгалал яамызы-биле керээ чарып алгаш, дайынчы хөделиишкиннер болуп турар черже чоруур деп шиитпирлеп алган.
Александра чорупкан соонда 3 ай болганда, ооң өөнүң ээзи база керээ чарып алгаш, профессионал шериг албанныг кижи апарган.
Керээ чарган соонда Александраны дайынчы хөделиишкиннерден 10 км ыракта турар Луганск Улус Республиканың Марковка деп суурунче чорудупкан. Ол барык бир дугаар чарган керээзиниң үезинде аңаа ажылдаан.
“Эртемим аайы-биле кезер эмчиниң сестразы болганымда, үемниң хөй кезиин кезиишкин кылыр өрээлге эрттирип турдум. Улаштыр балыгланган солдаттарның балыын шарып дузалажып турдум” – деп, Александра чугаалаан.
Александраның ажылдап турганы медицина бригадазы тус черниң тайбың чурттакчыларынга база эмчи дузазын чедирип турганнар.
“Чурттакчы чон боттары дуза дилеп кээп турганнар. Колдуунда бажың-балгадын каап шыдавас улуг назылыг кижилер арткан болду. Хөй-ле кижилер оларга дуза кадып кээп турарывыс дээш өөрүп четтиргенин илереттилер. Ол ышкаш биске боттарының белеткээн сүдүн эккеп берип турдулар” – деп, эмчи сестразы бодунуң төөгүзү-биле үлешти.
Ылаңгыя Александраның ажылдап турганы госпиталынга өөнүң ээзи-биле ужуражы берген төөгүзү сагыш-сеткилди доюлдуруптар. Ол хүн Александраның ажылдап турганы эмчи бригадазы өске госпитальче чоруур ужурлуг турган. Чоруур деп тургаш, ол өөнүң ээзинге таваржы бээр.
“Бис баштай бот-боттарывысты танышпайн барган бис. Ооң соонда кайы хире чоруп турарывысты чугаалажырынга 10 борбак минута арткан” – деп, эмчи сестразы сактып чугаалаан.
Кууларларның өг-бүлези оолдуг, кыстыг. Улуг оглу студент, автомеханик кылдыр өөренип турар. Күрүнениң деткимчезиниң ачызында ол төлевир чок өөренир кылдыр шилчиттирип алган. Бичии уруу авазының изин истеп, кижилерге дузалажыр эмчи болур күзелдиг.
Александраның ада-иези хүндүлүг дыштанылгада бажың ажыл-агыйы-биле ажаанзырап турарлар. Оларның ачызында тускай шериг операциязынга ажылдап турда таваржып келген бергелерни ажып эртип шыдап турарын эмнелге ажылдакчызы чугаалаан. Александра хостуг үезинде ыяш-биле чазанырынга аажок ынак.
Кезер эмчи сестразы ам база катап солдаттарга болгаш тайбың чурттакчыларга дуза кадары-биле тускай шериг операциязынче ажылдап чорупкан.
“Бистиң шериглеривиске дуза болгаш деткимче дүн-хүн чок херек. Тиилелгени чүгле солдаттар, эмнелге ажылдакчылары болгаш тайбың чурттакчылар шупту демнежип тургаш чедип ап болур бис” – деп, ол демдеглээн.
Ч. СААЯ белеткээн.