Чаштар сайзанактап олурганнар. Оларның элээн назы-хары дөгүй берген кырган-аваларын өттүнүп ойнап олурары чугаазындан-на илдең болган. Уругларның бирээзи:
– Харың ам каш апарды, угбам? – деп шаажаң аяан эптештир туда аарак өскезинден айтырып-тыр. Бирээзи олургаш:
– Беш-ле болгай – деп, кырган-авазын өттүне аарак харыылаан.
***
Дөрт харлыг Уран-оол:
– Улустуң авалары өлүп-ле каар чүве-дир. Мээң авамның өлбезин кайгаар мен – деп-тир. Чанынга олурган даай-авазы кайгай бергеш:
– Аваң өлүп каарга, чүзү эки чүвел, Уран-оол? – деп айтырган.
– Бөргүн алырымда – деп, бичии Уран-оол дүште-даа чок харыылаан.
***
Апрель 22-ниң хүнүнде кичээл эрттирер бетинде башкызы айтырган:
– Бөгүн кымның төрүттүнген хүнү ийик, уруглар?
– Борбаана Баржайның – деп, уруглар харыылаан.
***
Назы-хары шору улгады берген Андрей өөредилге черинче кирип алгаш, өөренип эгелээн. Бир катап башкызы:
– Коммуникабельный-дыр сен, эр хей, Андрей! – деп мактаан. Андрей боданып туруп-туруп:
– Шаанда харын кабельдер-биле ажылдап турган мен, башкы – деп-тир.
***
Тайгада малчын аалга өскен Орлана авазы-биле хоорайлааш чанып келген. Кырган-ачазы уйнуу кээрге амырап:
— Хоорайлаарга кандыг-дыр, кызым? – деп айтырып-тыр.
– Хоорай чуртталгазы магалыг-дыр, кырган-ачай. Олар хемден суглап-даа турбас, суу ханадан агып кээр чорду. Шай хайындырарда, чээрген чыып от-даа салбас, хөнекке сугну куткаш, үлгүүрге кырынга тургузуп каарга, шай боду-ла хайны бээр чорду.
Чурукту ГигаЧатка чуруткан.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...