Чашкы үем оранынче база катап
Чалгын бергеш, ужаал дизе, ынавас мен.
Чашкы үем чанымда бо каткы-хөглүг
Чаактары бопук-бопук маңнап турлар.
Чаңгыс эвес, назы-хары аңгы-аңгы
Чашкы шаамны кара олчаан сагындырган,
Атпаңайнып, бирги базым кылганым дег,
Ам бо шагда ажы-төлүм базып чорлар.
Салгалдарым куспактапкаш, чыттаарымга,
Чашкы шаамның чыды, даажы дыңналып кээр.
Саарылган чугаа-сооду, үнү безин
Чашкы шаамда мээң үнүм дыңналыр-дыр.
Оларымче көрүп алгаш, орарымга,
Оон артык эргим чүве кайда-даа чок.
Холун чада тудуп алгаш, маңнап кээрге,
Ховар дужар аас-кежик холумда бо!
Уруум оглу, оглум оглу, улуг кызы
Угум дөзеп, аймаам улаан уйнуктарым.
Сагыш хандыр эргеледип алырга-даа,
Ша-даа четпес, катап база сакты бээр мен.
Чана бээрге, бажың ишти шыпшың, куруг
Сагыш-сеткил оон артык ээнзирээр...
Хооларда чуруктарын көрүп алгаш,
Хойнумда дег, эргеледип тургулаар мен.
Чассыткаш-даа, хыым ханмас ажы-төлүм –
Чашкы шаамның катап келген эргилдези.
“Чаштарым-на эки өзүп, доруксун!” – деп,
Чалбарып-ла. “Чанынга үр чорзумза!” – деп...
Ындыг ынак эргимнерим каавыткаш,
Ында-кайда чашкы шаамны дилевес мен.
Ындын чүрээм оожургалы, таалалы
Ынакшылым дээжизи – уйнуктарым.
Чашкы үем чанымда бо. Халчып турлар.
Чашкы үем кай-даа барбаан. Өөм долдур.
Кырган-авам, кырган-ачам меңээ база
Кымдан артык ынак чораан. Ам мен база.
/ Орлан Дамба-Хуурак.