Март айның сөөлгү неделязы, школачыларның дыштаныр үезинде, республиканың К.И. Чуковский аттыг уруглар ном саңынга чылдың-на демдеглеп эрттирип турарывыс Бүгү-россияның Уруглар болгаш элээдилерниң номунуң байырлал неделязы болуп турар. Бо байырлалды демдеглеп эрттирери уругларга чугула болгаш уттундурбас өөрүнчүг сактыышкын болур дээрзи билдингир. Уругларның ном байырлалының неделязында бистиң ном саңында уругларга янзы-бүрү солун хемчеглер болуп эртип турар.
Март 24-те чурт-шинчилел болгаш чогаал килдизинге «Аяннажылга» деп солун ужуражылга болуп эрткен. Байырлалдыӊ кол аалчызы Тыва Республиканың алдарлыг артизи, В. Көк-оол аттыг Национал хөгжүм-шии театрының актрисазы Айзана Чылбак-оол база хемчегниң киржикчилери – Кызыл хоорайның 2 дугаар школазыныӊ өөреникчилери, «Уран-чечен» деп номчулга клувунуң кежигүннери, класс удуртукчузу Сай-Суу Алексеевна болганнар.
Ук хемчегниң кол сорулгазы тыва дылывысты, төрээн чогаалды хумагалап, кадагалап арттырары болуп турар. Уругларга аалчывыс С.А. Сарыг-оолдуӊ «Аңгыр-оолдуӊ тоожузундан» үзүндүлерни бараалгадып, аянныг шүлүктү чугаалап база тыва чоннуӊ кожаңнарын кожуун бүрүзүнде ырлажыры аңгы-аңгы, ылгалып турар аялгаларын чугаалап, көргүзүп, ырлап берген. Уругларның сонуургаан айтырыгларынга аалчывыс чедингир болгаш солун харыыларны берген.
Айзана Чылбак-оолду ук хемчегже чалаанывыс өөредиглиг, солун болганын келген аалчылар, өөреникчилер демдеглээн.
Өнермаа КУУЛАР, К.И. Чуковский аттыг уруглар ном саңының чурт-шинчилел болгаш чогаал килдизиниң кол библиотекары.
Авторнуң тырттырган чуруу.
«Шын» №11 2025 чылдың март 27