«Школаже белеткениринге дузалаш!» ачы-буянныг акцияны чаа өөредилге чылыныӊ бүдүүзүнде эрттирери эки чаӊчыл апарган.
Кызыл хоорайныӊ 2 дугаар ортумак школазынга ИХЯ-ныӊ Тыва Республика талазы-биле Күрүне автоинспекциязыныӊ эргелели элээн хөй чылдар дургузунда ачы-буян чедирип, дузалажып келген.
Күрүнениӊ автоинспекторлары школаныӊ хөй ажы-төлдүг өг-бүлелериниӊ уруг-дарыынга чылдыӊ-на өөредилге херекселдерин четчелеп суп каан белектерни чедирип берип турар. Ооӊ-биле чергелештир орук шимчээшкининиӊ чалыы киржикчилери – бичии уруглар дээш сагыш салып турарлар. Чүге дизе чадаг кижилерниӊ, пассажирлерниӊ, чолаачыларныӊ, чадаг-тергежилерниӊ аразындан эӊ-не хээрек болгаш онза камгалаар ужурлуг улус дээрге чаштар-дыр. Ынчангаш өөреникчилерниӊ рюкзактарынга болгаш солуй кедер идик сугар сумкаларынга быжыглаар айыыл чок чоруктуӊ эдилели – чырык херелдендирер чүүлдерни берген.
Школачылар өөрүп четтиргенин илереткеш, кудумчуга орук-шимчээшкининиң айыыл чок чоруунуӊ хоойлу-дүрүмнүг чурумун ыяк сагыырын аазаан. Уругларныӊ айыыл чок чоруу дээш сагыш човап, белек берип турары дээш ада-иелер сеткилинден өөрүп турарын чугаалаан.
Уругларныӊ айыыл чок чоруу, салым-чолу дээш сагыш човап, кичээнгей салыры, бичии улуска эки сеткилинден дуза чедиреринге белен болуру, оларны деткиири дээрге кижи бүрүзүнүӊ хамааты хүлээлгези дээрзин полиция ажылдакчылары демдеглээн.
Тыва Республика талазы-биле Күрүне автоинспекция эргелелиниӊ медээлеринден Р. ДЕМЧИК белеткээн.