Бичии Аяның авазы шайлыг стаканынче мөңгүн бичии омаашты супкаш, тайылбырлаан:
– Мөңгүн дыка хөй микробтарны узуткап кааптар чүве-дир ийин, уруум.
Вика кезек боданып олургаш, чугаалаан:
– Мен өлүг микробтар салдап турар шай ишпес мен.
***
Беш харлыг Солаңгының авазы садыгга шуба сонуургап, хемчээп кедип турда:
– Кандыг кончуг сеңээ тааржыр шуба боор, авай! – деп, уруу чугаалаан.
– Шынап-ла, тааржыр-дыр бе, уруум? – деп ылавылаан.
– Ийе, дыка чараш-тыр, авай! Артында-ла овчарка ытка дөмейлежи бердиң!
***
Агаарлаар дээн бичии Айлаң идиктери-биле үрелдежип олурган. Авазы уруун манап туруп-туруп, айтырып-тыр:
– Чаа-ла бир дугаар идииң кедип олур сен бе?
– Чок, ийи дугаарын кедип олур ышкажыл мен, авай. Бир дугаарын ам кедер мен – диген.
***
Үш харлыг Чиңгис чугаалап-тыр:
– Кандыг кончуг берге чүве ыйнаан, ырыктааштың ойбактары үш, а буттар чүгле ийи. Кайызынче кедери билдинмес.
***
Телевизорга идик-хеп садыының рекламазы мындыг сөстер-биле төнген:
«Бис бо садыгдан кеттинип тур бис. А силер?»
Ону дыңнаан бичии Дарыймаа:
– Кандыг кончуг мелегей улус боор, кижи бажыңынга-ла кеттинер ыйнаан, кудумчуга эвес – деп бодунуң уунда чугааланган.
***
Авазы оглунга соокта ыяап-ла чылыгланыр деп чагып, ынчанмас болза, өзүп келгеш, ажы-төл чок бооп болур деп үргүлчү тайылбырлаар турган.
Бир-ле хүн уруглар сады чоруурда, чылыг чүвүрүң кедип ал деп авазы Чаянны оралдажып шаг болган. Чадап кааш:
– Ынчап мени уйнуктар чок арттырар деп тур сен бе, дедир-даван?
Чаян улуг тынгаш:
– Че, харын, чүгле келир үеде уйнуктарың дээш чүвүрнү кедер болган-дыр мен.
Ада Тюлюштуң тырттырган чуруу
«Шын» №42 2026 чылдың октябрь 29
"Шын" солуннуң МАХ-каналынга каттыжыңар: max.ru/channel_shyn