Часкы хөөннер, өртектер

Южныйга, Востокка, Эне-Сайның оң, солагай эриктеринге газель, автобустарга сыңмарлажып, тынар арга чок кылдыр баскылажып чорааш безин, чоннуң чугаазын кулак салып дыңнап чоруур мен.

– Чунар-бажың өртээн таанда эмин эрттир өстүрүп алган-дыр але.
– Каш апарган-дыр?
– 300 рубль.
– Кончуун аа... багай самдар чунар-бажың одаар болган-дыр аа. Хинчектиин.
– Интернетке бижиир болза эки-дир, аныяктар, билир улус...
– А-аа, кым-даа тоовас диин дөмей-ле.

Чуртта дүшкүүрлүг байдал чоруп турар үеде оода чунар-бажың өртээн чоп кончуг өстүрер чүве ирги?! Хамык чон сагыш човап, Украинаже кош-комун аъткарып турда, чунар-бажыңнар ээлери амырап, байып турар мындыг бе. Чоннуң кадыы бирги черде турар ужурлуг эвес бе. Бо дугайын депутаттар билир ирги бе? Башка кандыг бодал кирбес дээр силер...

Бажыңга чоокшулап келгеш, кожамга ужуражы бердим. Чунар-бажыңнаарым ол деп бар чыдыр. Чунар-бажың 300 рубль апарган-дыр деп медээ дыңнааш:

– Акшам четпес-тир але – дээш, дедир бажыңынче кире болду.
Март айның аяс хүннеринде найысылалдың хөөлүг хары хөөннүг, хөөн чок аяар эрип чыткан. Айда чаңгыс алыр каш пенсиямны чунар-бажың өртээнге таарыштыр санаарымга, мүн-не ийи катап чунуп болур. Харын-даа пенсия үнүп турар ышкажыл, 1990 чылдар ышкаш шуут үнмес турган болза, та канчаар мен деп бодал-биле сагыш-сеткилим алаактырып, часкы хүннүң херелдеринге сыгдыгыр карактарым хере көөрүн оралдажып чор мен.

/ Владимир ООРЖАК.
Кызыл хоорай.

"Шын" 2023 чылдың март 29 №22

#Шын#Тыва#Чагаа #Чунарбажың #Шынныңпочтазындан