Часкы каникулдарда дыштанылга төптери ажылдап турар

Республиканың школачыларының часкы дыштанылгазында оларның хостуг үезин чөптүг ажыглаары болгаш оларны ажыктыг ажыл-ишке кадары-биле немелде өөредилге черлеринде, уругларның болгаш элээдилерниң спортчу база хөгжүм школаларында, көдээниң болгаш хоорайның уруглар библиотекаларында, культура бажыңнарында дыштанылганың түр үениң төптерин дагын катап ажыткан. Тывага часкы дыштанылга үезинде 177 уругларның дыштанылга төвү ажылдаар дээрзин Тываның Өөредилге яамызы дыңнаткан.

Спорт яамызының шугуму-биле 29 түр үениң дыштанылга төвүн организастаан, оларның 9-зу – «Эзирниң уязы» деп бичежек спорт залдарының чанында. Ында 1200 хире школачылар хаара туттунган.

Уругларның дыштанылга төптериниң школачылар-биле чорудуп турары ажылдарының угланыышкыннары янзы-бүрү – амыдыралдың кадык овур-хевири, эштиринге болгаш ниити инструктажтар. Спортчу хемчеглер, агаарлаашкын болгаш экскурсия үелеринде уруглар өртке болгаш орук-транспорт озал-ондаанга база өске-даа ондактарга удур айыыл чок чоруктуң дүрүмнерин быжыглап, бүгү Россияның “Күш-ажылга болгаш камгалалга белен бол!” (ГТО) деп күш-культура-спорт комплекизиниң нормативтериниң дужаалдазынга белеткенип турарлар.

Уруглар хүннүң-не шимченгир оюннар-биле хаара туттунган, хол-бөмбүү, баскетбол, мини-футбол, регби, хостуг хүреш, сумо, шашки, шыдыраа, армреслинг болгаш тыва хүреш кичээлдеринге барып турарлар.

#Шын #Тыва #УругларныңДыштанылгаТөвү #ӨөредилгеЯамызы #Медээ