Росхереглелхайгааралдың Тыва Республикада эргелелиниң негелдезинге даянган судтуң шиитпири-биле «Ковчег» кафе-барның ажылын түр үеде соксаткан. Арага продукциязы садарының негелделерин чаңгыс эвес удаа үрээн садыг объектизи кылдыр корум-чурум камгалаар органнарның оперативтиг дыңнадыында ол кирген.
Тывада аар болгаш онза аар кем-херек үүлгедиишкиннеринге удур ведомстволар аразында кады ажылдажылга планы-биле, Росхереглелхайгааралдың ажылдакчылары суд херээнге буруудаткан материалдарны чыгган. Тываның Баштыңы Владислав Ховалыг араганы хоойлуга чөрүштүр садар фактыларны илередиринге ведомстволар аразының кады ажылдажылгазын күштелдирер даалганы берген.
Ведомстволар аразының бөлүү эрткен неделяда 208 хыналданы чоруткан. Кызыл хоорайга, Кызыл, Улуг-Хем, Чеди-Хөл кожууннарга эрткен рейд үезинде, спирт холуксаалыг продукцияны хоойлу сагывайн садып турган 11 фактыны илереткен. Ооң түңнелинде 682,9 литр арага продукциязын садыг-саарылгадан хавырган.
Владислав Ховалыгның бот-идепкейи-биле вайбер биле телеграмм мессенджерлерде ажылдаткан “Идепкейлиг хамааты” чат-бот таварыштыр хамаатыларның дыңнадыгларынга хамаарыштыр хыналда-хайгараал, корум-чурум камгалаар болгаш күүсекчи органнарның кады ажылдажылгазын организастаан.
ТР-ниң Иштики херектер яамызы тус чер бот-башкарылга органнары база Лизенция албаны-биле кады чат-ботче келген информацияларны хынап, Кызыл, Ак-Довурак хоорайлар, Каа-Хем, Кызыл, Бии-Хем, Тере-Хөл, Тес-Хем, Улуг-Хем кожууннар девискээринде 11 садыг объектилеринде арага болгаш спирт холуксаалыг продукцияны хоойлуга чөрүштүр садып турган 12 фактыны илереткен.
Полиция биле ведомстволар кады ажылдаанының түңнелинде, хөй-ниити чемненилгезиниң ачы-дуза чедирилгезинде СанПин дүрүмнерин сагываан сайгарлыкчыларга онааштыр 17 административтиг херекти ажыдып, 9 негелдени судче кииргенин Росхереглелхайгааралдың ТР-де эргелелиниң удуртукчузу Людмила Салчак дыңнаткан. Полицияның Кызыл мэриязының, Үндүрүг инспекциязының база Ажыл-чорудулганың чамдык хевирлеринге лизенция бээр албанның ажылдакчылары кирген ведомстволар аразының рейдилери хуу сайгарлыкчылар санитарлыг негелделерни ооң мурнунда-ла херексевейн турарын илереткен. Садыг объектилериниң ээлери база оларның садыгжылары арага болгаш спирт холуксаалыг продукцияны хоойлуга чөрүштүр садып-саарганындан чаңгыс эвес катап административтиг харыысалгага онаажып турган.
Профилактика субъектилериниң кады ажылдажылгазының ачызында, бо чылдың эгезинден Кызыл хоорай девискээринге эзирик байдалда кижилерниң кем-херек үүлгедиглериниң саны 27,6 хуу (337-ден 244 чедир) кызырылганын Тываның Баштыңының Администрация биле Чазак Аппарадының регионалдыг айыыл чок чорук департаментизи дыңнаткан.