Чеди-Хөлде хөм идиктер мастерскаязы

Чеди-Хөлде чагыг ёзугаар спортчуларга, артистерге хөм идиктер, эдилелдер даараар мастерская ажылдап турар.

Хову-Аксынга шак ындыг черни 30 харлыг аныяк оол социал керээ-биле бо чылын ажыдып алган. Ооӊ адын Омак Оюн дээр. Ус-шевер мастерлерниӊ чанынга кады ажылдап тургаш, хөмден идиктерни, сумкаларны болгаш өске-даа эдилелдерни канчаар даараанын ол өөренип алган. Мергежилдиӊ аргаларын, чажыттарын билип, даарап өөренип алган соонда, боду аӊгы мастерская ажыдып алыр деп шиитпирлээн. Чеди-Хөл кожууннуӊ Чонну ажылга хаара тудар төвүнге чеде бергеш, специалистер-биле сүмелешкен. «Социал керээ» деп программага киржири-биле кандидатуразын киирген.

«Аныяк кижиниӊ эгелекчи саналын баштай хууда хүлээшкин үезинде дыӊнадым. Бодунуӊ хуу ажыл-херээн ажыдып алыр чүткүлүн дораан эскердим. Кожуун чагыргазыныӊ мурнундан аӊаа ажылдаар оран-сава тып бергеш, документилерин кылдырып алырынга дузалаштывыс. Идик септээри чонга кайы-даа үеде херектиг хандырылга-дыр. Кожуунда мастерская бар болганда, улус ам идик кылдырар дээш, хоорайга мастерская дилеп турбас» – деп, Чеди-Хөл кожууннуӊ чагырыкчызы Адыгжы Араптан чугаалаан.

Омак Оюн ажылдаар чепсээн – даараныр машинаны, шивегейни, масканы, идик степлерин болгаш мастерскаяныӊ өске-даа херекселдерин, эт-севин садып алган. Кожууннуӊ культура эргелели танцы-сам үезинде кедер чараш идиктерни, а спортчулар хостуг хүреш мөгелериниӊ тускай идиктерин чагыг-биле даарадып алыр күзелин илереткен.
/ Р. ДЕМЧИК белеткээн.